4 bala ólimi tirkelgen Aıagózdegi ortalyqqa qatysty qandaı sharalar qabyldanýda
NUR-SULTAN. QazAqparat - Shyǵys Qazaqstan oblysy Aıagóz qalasyndaǵy arnaıy áleýmettik kómek ortalyǵynda 4 balanyń ólimine qatysty vedomstvoaralyq komıssııa otyrysy ótti, dep habarlaıdy QazAqparat tilshisi.
Zoom tuǵyrnamasynda onlaın formatynda ótken otyrys barysynda Shyǵys Qazaqstan oblysy ákiminiń orynbasary Álisher Marhabat atalǵan oqıǵaǵa baılanysty Aıagózde komıssııa otyrysy ótkendigin, bas pedıatr men dárigerler toby ortalyqta tárbıelenip jatqan 95 balany tekserip shyqqanyn atap ótti.
«Tolyqtaı alǵanda, komıssııa balalar belgili bir standartqa saı medıtsınalyq-áleýmettik kólemdi tolyqtaı alady degen pikirge keldi. Qazirgi ýaqytta komıssııalyq tekserý jalǵasýda. Shyǵys Qazaqstan oblystyq taýarlar men kórsetiletin qyzmetterdiń sapasy men qaýipsizdigi departamenti de tekserýin jalǵastyryp jatyr. Medıtsınalyq qujattardy júrgizý bóliginde zań buzýshylyqtar anyqtaldy. Olardyń protsessýaldyq normalaryna sáıkes sál keıinirek jarııa etiledi. Ózderińiz de bilesizder, ishki ister organy balalardyń ólimine qatysty fakti boıynsha QR QK 317-baby 4-bóligi boıynsha qylmystyq is qozǵady. Sotqa deıingi tergeý bastaldy. Jalpy, vedomstvoaralyq komıssııa otyrysyndaǵy eskertýlerge baılanysty ortalyqta karantın sharalary aıqyndalǵan. Jańa pedıatr balalarmen jeke jumys isteıdi», - dedi ol.
Osy oraıda komıssııa otyrysyna tóraǵalyq etken Bilim jáne ǵylym mınıstri Ashat Aımaǵambetov 5 memlekettik organ atalǵan ortalyqta tekserý júrgizip jatqandyǵyn atap ótti. Sonymen qatar oǵan biraz ýaqyt ketetindigin de eskertti.
«Degenmen, tek Aıagózge ǵana qatysty emes júıeli problemalardyń bar ekendigin qazirden-aq baıqap otyrmyz. Sońǵy ýaqyttaǵy rezonansty oqıǵalar munyń júıeli sıpatta ekendigin kórsetip otyr. Aıagózdegi balalar ortalyǵy jaıynda aıtar bolsaq, 1 jylǵa jýyq ýaqyttyń ishinde mundaı jaıttar az bolmady. Ótken jyldyń tamyzynda qylmystyq is qozǵalǵanymen zań buzýshylyqtar anyqtalǵan joq dep tanyldy. Alaıda rezonansty jaıttar júıeli máselelerdiń bar ekendigin bildiredi», - dedi Bilim mınıstri.
Esterińizge sala ketsek, osyǵan deıin Aıagózdegi áleýmettik kómek ortalyǵynda 4 balanyń qaıtys bolǵandyǵy habarlandy. QR Іshki ister mınıstrligi istiń tergelýin óz baqylaýyna aldy. Osy oqıǵadan keıin QR Eńbek jáne halyqty áleýmettik qorǵaý mınıstrligi elimizdiń ár óńirinde ornalasqan medıtsınalyq-áleýmettik kómek kórsetetin 113 mekemege tekserý júrgiziletinin málim etti. Onyń ishinde Aıagózdegi balalarǵa arnalǵan arnaıy áleýmettik kómek ortalyǵy bar.