4 aılyq balanyń ómirine qaýip tóndirý faktisi boıynsha qylmystyq is qozǵaldy
ASTANA. 11 tamyz. QazAqparat - 5 tamyz kúni Astana qalalyq ishki ister departamentiniń jedel basqarý ortalyǵyna 4 aılyq náresteniń joǵalǵandyǵy týraly aqparat kelip tústi, dep habarlady vedomstvonyń baspasóz qyzmetinen.
1975 jyly týǵan L. esimdi azamatsha balanyń joǵalǵandyǵy týraly aryz bergen. Polıtsııa qyzmetkerlerine jazǵan aryzynda ol ózimen birge turatyn 1989 jyly týǵan Astana qalasynyń turǵyny S. esimdi azamatpen qurby qyzdyń saıajaıyna barǵandyǵyn jazǵan. Ol jerge barǵan soń ekeýiniń arasynda janjal týyndap, jas jigit áıeldiń qolynan balany julyp alyp, aıaldamaǵa qaraı bet alǵan. osydan keıin avtobýsqa otyrǵan S. esimdi azamat belgisiz baǵytqa ketken. Birneshe ýaqyt ótken soń aryzdanýshy jigitti uıqyda jatqan jerinen tapqan. Qyzy týraly suraǵyna jigit aǵash butalarynyń arasynda tastap ketkenin, biraq naqty qaı jer ekeni esinde qalmaǵandyǵyn aıtqan.
Sábıdi izdeý úshin Esil aýdandyq ishki ister basqarmasynyń barlyq jeke quramy jumyldyrylyp, sonymen qatar ózenderdi tekserý úshin sýǵa súńgýshiler de qatysqan.
Balany kelesi kúni, 6 tamyzda saǵat 12.00 shamasynda polıtsııa qyzmetkerleri saıajaı aýdanyna qarasty aýmaqtardy tekserý barysynda tapqan. Tabylǵan kishkentaı náreste jedel-járdem qyzmetine berilip, ári qaraı dárigerlik tekseristen ótkizý úshin 2 aýrýhanaǵa jatqyzyldy.
Osy is boıynsha QR QK-niń 119 babymen kózdelgen (qaýipti jaǵdaıda qaldyrý) qylmys quramdary boıynsha qylmystyq is qozǵaldy. Qazirgi kezde atalǵan azamat Astana qalalyq ІІD ýaqytsha oqshaýlaý abaqtysyna qamaldy.
