4 aıda el ekonomıkasyna tartylǵan ınvestıtsııalar qaı salalarǵa jumsaldy

ASTANA. KAZINFORM — Ulttyq ekonomıka mınıstrligi bıyl 4 aıda tartylǵan ınvestıtsııalar negizinen qaı salalarǵa jumsalǵanyn atady. 

— Strategııalyq josparlaý jáne reformalar agenttigi Ulttyq statıstıka bıýrosynyń aqparatyna sáıkes, osy jyldyń qańtar-sáýir aılarynda negizgi kapıtalǵa 756,4 mlrd teńge (17,3%) syrtqy ınvestıtsııalar jáne 3 618,3 mlrd teńge (82,7%) ishki ınvestıtsııalar tartyldy. Investıtsııalardyń kóp bóligi kelesi salalarǵa jumsaldy: ónerkásip — 1 729,1 mlrd teńge (39,5%); jyljymaıtyn múlikpen operatsııalar — 913,7 mlrd teńge (20,9%); kólik jáne qoımalaý — 578,0 mlrd teńge (13,2%), — delingen vedomstvonyń agenttik saýalyna bergen jaýabynda.

Ekonomıkalyq zertteýler ınstıtýtynyń dereginshe, 2025 jyldyń 1-toqsanynyń qorytyndysynda elimizge tikeleı shetel ınvestıtsııanyń jalpy aǵyny 6,6 mlrd AQSh dollaryn qurady. Bul ótken jyldyń sáıkes kezeńimen (6,2 mlrd dollar) salystyrǵanda 6,2 paıyzǵa artyq.

Investıtsııalardyń jalpy aǵynynyń ósýine negizgi úlestikelesi sektorlar qamtamasyz etti:

— Aqparat jáne baılanys — aǵyn 9,5 ese;
— Qarjy jáne saqtandyrý qyzmeti — 2,5 ese;
— Óńdeý ónerkásibi — 27,6 paıyz.

— Jyljymaıtyn múlikte, turý jáne tamaqtaný qyzmetterinde jáne basqa da qyzmetterde edáýir ósim baıqalady, — dep atap ótedi Ekonomıkalyq zertteýler ınstıtýty.

Al dástúrli salalarǵa aǵynnyń tómendeýi tirkeldi. Naqtyraq aıtqanda, taý-ken ónerkásibine ınvestıtsııa 44,1 paıyzǵa az tústi. Qurylysta 76,5 paıyzǵa tómendedi. Teris dınamıka kólikte, saýdada, bilim men mádenıette, sondaı-aq kásibı, ǵylymı jáne tehnıkalyq qyzmette tirkeldi.

Buǵan deıin jaýapkershiligi joǵary ınvestorlarǵa qosymsha salyqtyq jeńildikter beriletindigin jazǵan edik.