4 aıda 40 myń usynys: Muǵalimderdiń qandaı talap-tilekteri bar

ASTANA. QazAqparat - Memlekettik organdardyń keıbiri «Pedagogtar mártebesi týraly» zań jobasy boıynsha muǵalimderge usynylǵan jeńildikterdiń keıbirin maquldamaı jatyr. Bul týraly qazaqstandyq bilim jáne ǵylym qyzmetkerleri kásipodaǵynyń uıymdastyrýymen Astanada ótip jatqan dóńgelek ústelde QR Bilim jáne ǵylym qyzmetkerleri kásipodaǵy tóraǵasynyń orynbasary Aıgúl Muqasheva aıtyp berdi, dep habarlaıdy QazAqparat tilshisi.

«Pedagogtar mártebesi týraly zań jobasy bizdiń qoǵamda eń kóp talqylanǵan taqyryptardyń biri bolyp otyr. Úlken jumys atqaryldy. Osy ýaqytqa deıin zań jobasy boıynsha jumys tobyna 4 aıdyń ishinde 40 myńnan astam usynys kelip tústi. Áli de saıtymyzǵa kelip jatqan usynystar saıabyrlaıtyn emes. Saraptap qarap otyrsaq, usynystardyń 34 paıyzy zeınetke ýaqytynan buryn shyǵý týraly. Kelesi 28 paıyz jalaqy men ústemaqyny kóterý máselesin qamtyǵan. Taǵy 10 paıyzy turǵyn úı alýda jeńildik berýdi surasa, 22,7 paıyzy pedagogtardyń mindetine jatpaıtyn jumystarǵa qatyspaý men júktemeni azaıtýdy suraǵan», - deıdi Aıgúl Muqasheva.

Onyń aıtýynsha, jumys toby zań jobasyn ázirlep, memlekettik organdarǵa joldaǵanymen, kóptegen usynystardy vedomstvolar maquldamaǵan.

«Bizdiń pedagogtardy baspana máselesi óte kóp alańdatatyny belgili. Sebebi, muǵalimderdiń jalaqysy óte tómen. «7-20-25» memlekettik baǵdarlamasy boıynsha, muǵalim jalaqysymen úı ala almaıdy. Sol sebepti, biz mynadaı normany qosyp edik. Pedagogtyń bastapqy jarnasyn jeńildetilgen nesıe arqyly berý, sonymen qatar qyzmettik baspana nemese jataqhana alýy sekildi jeńildikter usynylǵan. Sondaı-aq, qyzmettik baspanada pedagogpen birge turyp jatqan otbasy múshelerine pedagog qaıtys bolǵan jaǵdaıda májbúrli túrde qyzmettik baspanadan shyǵarylmaı, olardyń qalaýymen qaldyq quny boıynsha satyp alýǵa múmkindik beriledi degen normany qostyq. Biraq, ókinishke qaraı kelisim kezinde bul norma da alynyp tastaldy», - deıdi Aıgúl Muqasheva.

Onyń aıtýyna qaraǵanda, taǵy da bir norma - jergilikti atqarýshy organdar pedagogtardyń jalaqy kólemin óńirdegi ortasha jalaqy deńgeıine qaraı belgileýge quqyly etýdi kózdegen. Biraq, bul norma da maquldanbaǵan.

«Astananyń pedagogtarynyń mártebesin kóterý jolynda taǵy bir usynys berip edik. Astanada jumys isteıtin muǵalimderge jalaqylaryna 25 paıyz ústemaqy qosýdy alǵa tartqanbyz. Sebebi, bul álemdik tájirıbede bar. Kóp elderdiń astanalarynda jumys isteıtin osyndaı ústemaqy tólenedi. Biraq, bul norma da maquldanbady», - deıdi Aıgúl Muqasheva.