4 aı ishinde 33 adam sýǵa ketti - TJM
ASTANA. 15 mamyr. QazAqparat - Tótenshe jaǵdaılardyń qutqarý qyzmeti sýda oryn alatyn apattarǵa, oqys oqıǵalarǵa baılanysty jedel kómek kórsetý úshin udaıy jaýyngerlik daıyndyqta tur.
Alaıda júrgizilip jatqan sharalarǵa qaramastan 2012 jyldyń 4 aıy ishinde respýblıka aýmaǵynda 363 adam sýdaǵy oqys oqıǵalarǵa tap bolyp, 330 adam qutqaryldy. 33 adam sýǵa ketip, qaza boldy. Onyń ishinde 5 bala bar. Bul týraly búgin atalǵan vedomstvoda ótken brıfıng barysynda resmı ókil Lıýbov Shaposhnıkova málim etti.
Resmı ókildiń aıtýynsha, 2011 jyldyń osy kezeńdegi 4 aıymen salystyrǵanda bul aıtarlyqtaı úlken kórsetkish bolyp otyr. Óıtkeni, byltyrǵy jyldyń 4 aıynda 93 adam sýdaǵy oqys oqıǵalarǵa tap bolsa, onyń ishinde 70 adam qutqarylyp, 20 adam sýda qaza bolǵan edi.
«Bıylǵy jyly sýdaǵy oqıǵalarǵa baılanysty apatqa ushyraǵandar sanynyń kóbeıýiniń óz sebebi bar. Óıtkeni, 2012 jylǵy 22 sáýirde Kúrshim ótkelinde tótenshe jaǵdaı oryn alǵan bolatyn. Onda «Samaı» paromy qatty jeldiń saldarynan jaǵaǵa toqtamaqshy bolyp, oǵan onshaqty metr jete almaı qaırańǵa turyp qalǵan edi. Osyǵan oraı, Shyǵys Qazaqstan oblysynyń tótenshe jaǵdaılar departamenti sýda qutqarý qyzmetimen jaǵaǵa 191 adam qutqarylyp, jetkizildi», - deıdi L. Shaposhnıkova.
Keltirilgen málimetterge qaraǵanda, sý nysandarynda adamdardyń qaza bolýynyń basty sebebi sýdaǵy qaýipsizdiktiń mindetti qaǵıdalarynyń saqtalmaýy, ony óreskel buzýdan týyndaıdy eken. «Máselen, sýǵa túsý maýsymynda qaza bolý oqıǵasynyń 75 paıyzy tyıym salynǵan jáne arnaıy jabdyqtalmaǵan, kúzet qyzmeti qarastyrylmaǵan toǵandarda, sý aıdyndarynda oryn alady. Al sý nysandarynyń janynda ata-ana qaraýynsyz qalǵan balalardyń sýǵa ketý faktileri 15 paıyzdy qurasa, mas kúıinde sýǵa túsip, onyń sońy ólimmen aıaqtalatyn oqıǵalar 10 paıyzdy qurap otyr», - deıdi resmı ókil.
Onyń aıtýyna qaraǵanda, sýǵa túsý maýsymy barysynda jazataıym oqıǵalardyń basym bóligi Almaty, Ońtústik Qazaqstan, Qostanaı, Qyzylorda, Jambyl oblystarynyń sý nysandarynda oryn alyp keledi. «Qapshaǵaı sý qoımasynyń jaǵalaýynda da jyl saıyn oqys oqıǵalar jıileıtinin atap ótken jón. Bunda 100 shaqyrymnan astamǵa sozylyp jatqan sý jaǵalaýynda 500-ge tarta demalys bazasy qyzmet etýde. Degenmen olardyń basym bóligi sý nysandaryna qatysty qaýipsizdik qaǵıdalaryn durys saqtap otyrǵan joq», - deıdi L. Shaposhnıkova.
