4 aqpan - Búkilálemdik rak aýrýyna qarsy kúres kúni
ALMATY. Aqpannyń 4-i. QazAqparat / Ádilet Musahaev / - Ratsıondy tamaq, temeki shegýden bas tartý, salaýatty, belsendi ómir saltyn saqtaý sharalary qaterli isiktiń 40 paıyzyn boldyrmaýǵa ákeledi.
Bul jaıynda Almaty qalasy nyń Densaýlyq saqtaý basqarmasynyń qyzmetkeri Roza Qýanyshbaeva búgin ótken baspasóz máslıhatynda málim etti, dep habarlaıdy QazAqparat.
Qazaqstanda sońǵy jyldary 28-30 myńdaı adam qaterli isik boıynsha esepte otyrsa, onyń úshten bir bóligi jyl saıyn kóz jumady eken. Temeki shegý qazirgi tańda qaterli isiktiń ósý qaýpiniń sebepteri men faktorlaryna áser etetin basty oryn alýda. Sonymen qatar, sút bezi jáne as qorytý organdarynyń qaterli isikteri kóptep kezdesedi.
R.Qýanyshbaevanyń aıtýynsha, qazirgi zamanǵy dıagnostıka men emdeýdiń ádisteri, memleketpen kepildengen mamandandyrylǵan jáne sapaly dárigerlik járdemdi árbir qazaqstandyqqa qol jeterlikteı etý kerek. «4-aqpan kúni qalamyzdyń búkil emhanalarynda almatylyqtar úshin ashyq esik kúni ótedi. Munda olar onkolog-dárigerlerden, basqa da mamandardan keńes ala alady. Óıtkeni, rakty neǵurlym erte anyqtasaq, soǵurlym ony jeńý múmkindikteri de artady. Mammografııa dıagnostıkasy - qaýipsiz zertteý ekenin halyqqa jetkizýimiz kerek. Sút bezi isigi erte kezeńderde anyqtalatyn bolsa, ol emdelýge keletin aýrý túri. Bul úshin halyqqa skrıngtik baǵdarlamalaryn engizý jolymen erte dıagnostıka úrdisin jónine keltirý kerek», deıdi Roza Qýanyshbaeva.
«Zdorovaıa Azııa» qoǵamdyq qory QR Densaýlyq saqtaý mınıstrligimen birigip, «Nur Otan» HDP-nyń áleýmettik keńes fraktsııasy jáne LG Electronikcs Almaty Kazakhstan kompanııasynyń qoldaýymen 5 jyl boıy «Áıel densaýlyǵy - ult densaýlyǵy» degen atpen keń aýqymdy skrınıng baǵdarlamasyn júzege asyryp keledi. «Jalpy, bul baǵdarlama barysynda 2009 jyldyń naýryzynan bastap qazanǵa deıingi ýaqytta 17 399 áıel tekserildi. Onyń ishinde 7834-i sút beziniń túrli patologııasyna ushyraǵandar, al 1405-i rak aldy aýrýlar, olar qosymsha tekserýdi talap etti», deıdi «Zdorovaıa Azııa» qoǵamdyq qorynyń prezıdenti Naǵıma Plohıh. Sondaı-aq ol 2010 jylda «Men senimen: Hospıs - balalar úshin» qozǵalysyn uıymdastyrýdy kózdep otyrǵandyǵyn jetkizdi. «Bizdiń emdelýshilerdiń eń panasyz toby - emdelýge kelmeıtin onkoaýrýlarymen aýyratyn balalar. Olarǵa bizdiń kómegimiz, járdemimiz, mahabbatymyz kerek. Endeshe Qazaqstanda birinshi balalar hospısi ashylý qajet ekeni sózsiz, jáne ilki joba sııaqty ol birinshiden Almatyda, sodan respýblıkamyzdyń basqa da qalalarynda ashylsa jaqsy bolar edi», deıdi N.Plohıh.
