4,8 mlrd teńgege 880 myń gektar jer qaıtaryldy - Bas prokýratýra

NUR-SULTAN. QazAqparat - Jerdi utymdy paıdalaný boıynsha prokýratýranyń qadaǵalaýymen 4,8 mlrd teńgege 880 myń gektar jer qaıtaryldy. Bul týraly búgin Bas prokýror Ǵızat Nurdáýletovtiń tóraǵalyǵymen ótken vedomstvonyń keńeıtilgen alqa otyrysynda aıtyldy, dep habarlaıdy QazAqparat.

«Jyl basynan beri tergeý organdarynyń 328 myń qaýlysynyń 286 myńy ǵana zańdy dep tanyldy, al qalǵandary kelisýden bas tartylǵan nemese olar qaıta pysyqtaýǵa joldanǵan. Nátıjesinde tergeý sapasy artyp keledi, azamattardy qylmystyq sheńberge negizsiz tartýdyń alǵashqy satysynda joly kesilgen», - delingen Bas prokýratýra usynǵan habarlamada.

Sonymen qatar áleýmettik-ekonomıkalyq salada daǵdarysqa qarsy sharalardy iske asyrý, jerdi utymdy paıdalaný, azamattardy dárilik zattarmen qamtamasyz etý, qorshaǵan ortany qorǵaý, balalardyń quqyqtaryn qorǵaý jáne basqa da ózekti baǵyttar boıynsha nátıjeli tekserýler men taldaýlar júrgizilgen.

Sonyń nátıjesinde prokýrorlardyń qadaǵalaý aktileri boıynsha 4,8 mlrd teńgege 880 myń gektar jer qaıtarylyp, 1027 bıznesti zańsyz tekserýdiń kúshi joıyldy. Memlekettik sanıtarııalyq dárigerlerdiń negizsiz shekteýleri bar 60 qaýlysy ózgertilip, zańǵa sáıkestendirildi.

Vedomstvonyń alqa otyrysyna Bas prokýratýranyń, Quqyqtyq statıstıka jáne arnaıy esepke alý jónindegi komıtettiń, Quqyq qorǵaý organdary akademııasynyń basshylyǵy, Bas áskerı jáne Bas kólik prokýrorlary, Nur-Sultan, Almaty, Shymkent qalalarynyń jáne oblystardyń prokýrorlary qatysty.