4-7 jylǵa sottalady: Bas prokýratýra qyz alyp qashqandarǵa qandaı jaza bar ekenin túsindirdi

NUR-SULTAN. QazAqparat - QR Bas prokýratýrasy qyz alyp qashqan jaǵdaıda qandaı jaza qarastyrylǵanyn túsindirdi, dep habarlaıdy QazAqparat.

«Qyz alyp qashý - salt-dástúr me, qylmys pa, muny ajyratýdyń bir joly bar, ol - qalyńdyqtyń kelisim berýi jáne alyp qashqan adamdardyń osyndaı kelisimniń baryn túsinýi. Basqasha aıtqanda, kelisim bermegen qyzdy erkinen tys alyp qashsa, kúshtep ustap, basqa jerge aparsa, alyp qashqandar osy mán-jaıdy bilse - bul aýyr qylmys sanalady. Qylmystyq kodekstiń 125-baby - adam urlaý boıynsha 4 jyldan 7 jylǵa deıin bas bostandyǵynan aıyrý jazasy qarastyrylǵan. Al eger kámeletke tolmaǵan qyzdy urlasa, bul jaǵdaıda 7 jyldan 12 jylǵa deıin sottalýy múmkin jáne múlki tárkilenedi» dep málim etti Bas prokýratýradan.

Vedomstvo habarlaýynsha, bul qylmys úshin eń qatal jaza - 15 jylǵa sottaý.

Onyń ishinde top bolyp alyp qashsa, jábirlenýshini abaısyzda óltirip alý jáne basqa aýyr jaǵdaılarǵa ákep soqsa, urlanǵan adamdy qanaý maqsatynda jasalsa, osyndaı aýyr jaza qoldanylýy múmkin.

«Eger sizdi alyp qashsa nemese kóz aldyńyzda osyndaı jaǵdaı bolsa, dereý 102 qyzmetine qońyraý shalyńyz. Polıtsııaǵa múmkindiginshe kóliktiń markasy, túsi, nómiri, alyp qashqandardyń túr-álpeti, kıimi sekildi erekshe belgilerdi habarlańyz. Bul jaǵdaıda jaı ǵana kýáger bolsańyz da, aryz jazylmasa da qylmystyq is qozǵalyp, tergeý bastalady. Eger urlaǵan adam jábirlenýshini bosatsa jáne onyń áreketinde qylmystyq quram bolmasa, ol qylmystyq jaýapkershilikten bosatylady» delingen habarlamada.

Aıta ketý kerek, Qazaqstanda neke jasy - 18.