4-5 sáýirde birinshi Samarqand halyqaralyq klımattyq forýmy ótedi
TAShKENT. KAZINFORM - 4-5 sáýirde «Silk Road Samarkand» kongress-ortalyǵynda birinshi Samarqand halyqaralyq klımattyq forýmy ótedi, dep habarlaıdy ÓR Ekologııa, qorshaǵan ortany qorǵaý jáne klımattyń ózgerýi mınıstrligi.
Forýmǵa Ortalyq Azııa elderiniń, sonyń ishinde Ózbekstan, Qazaqstan, Qyrǵyzstan, Tájikstan, Túrkimenstan basshylary, sondaı-aq Eýropalyq Odaq, BUU, halyqaralyq qarjy ınstıtýttary, jetekshi ekologııalyq uıymdar ókilderi qatysady dep josparlanǵan.
«Ortalyq Azııa jahandyq klımattyq syn-qaterlermen betpe-bet kelip otyr: ortaq órkendeý úshin birigý» dep atalatyn forým Ortalyq Azııa men álem aldynda turǵan ózekti klımattyq problemalardy talqylaý úshin álemdik kóshbasshylardy, saıasatkerlerdi, sarapshylardy jáne belsendilerdi jınaıdy.
Ol ekologııalyq turaqtylyq, jasyl ekonomıkany damytý jáne klımatqa tózimdilik máseleleri boıynsha dıalogty ilgeriletý úshin joǵary deńgeıdegi platformaǵa aınalady dep josparlanǵan.
- Basty nazar aımaqtyq jáne halyqaralyq yntymaqtastyqqa aýdarylady. Klımattyq forýmda jańartylatyn energııa kózderin damytý, sý resýrstaryn keshendi basqarý, bıoalýantúrlilikti saqtaý jáne turaqty qalany damytý sııaqty negizgi salalar boıynsha sarapshylyq panelder, plenarlyq sessııalar jáne saıası dıalogtar bolady, - delingen habarlamada.
Talqylaýdyń basty taqyryptarynyń biri – jahandyq ekologııalyq apattyń jarqyn mysaly – Aral daǵdarysy. Sarapshylar men úkimet ókilderi zardap shekken aımaqtardaǵy jerlerdi qalpyna keltirý, shóleıttenýmen kúresý jáne klımattyń ózgerýiniń áleýmettik-ekonomıkalyq saldaryn jeńildetý boıynsha barlyq sheshimdi qarastyrady.
Jıynnyń negizgi qorytyndysy Samarqand forýmynyń qorytyndy qujaty – «Jasyl» damýdyń óńirlik tujyrymdamasynyń tusaýkeseri bolady. Ol klımattyń ózgerýi salasyndaǵy Ortalyq Azııa elderiniń birtutas óńirlik kózqarasyn qalyptastyrýǵa negiz qalaıdy. Onda jetekshi halyqaralyq uıymdardyń aımaqtaǵy ekologııalyq problemalardy sheshýge degen kózqarasy kórsetilgen.
Eske sala keteıik, Týrıster áz-Naýryzdy birden eki elde – Qazaqstan men Ózbekstanda qarsy alady.