4,5 myńnan astam elordalyqtyń bala kútimi boıynsha alatyn járdemaqysy uzartyldy

ASTANA. QazAqparat – Bala kútimi boıynsha 4,5 myńnan astam elordalyqtyń járdemaqy merzimi uzartyldy. Muny Óńirlik kommýnıkatsııalar qyzmetinde Eńbek jáne áleýmettik qorǵaý komıtetiniń Astana qalasy boıynsha departamenti basshysynyń áleýmettik suraqtar boıynsha orynbasary Dámejan Sadýaqasova aıtty, dep habarlaıdy QazAqparat tilshisi.

«Memleket basshysy 2022 jylǵy 1 qyrkúıektegi Qazaqstan halqyna Joldaýynda bala kútimi boıynsha járdemaqy tóleý merzimin 1 jyldan 1,5 jylǵa deıin ulǵaıtý týraly tapsyrma berdi. Osylaısha, 2023 jyldyń 1 qańtarynan bastap bosanǵan áıelderge 1,5 jylǵa járdemaqy taǵaıyndady. Al 2023 jyldyń 1 qańtaryna deıin járdemaqy alyp otyrǵandardyń tólemi avtomatty túrde taǵy 6 aıǵa uzartyldy. Jalpy, 1 qańtardan bastap elorda boıynsha 4,5 myńnan astam adamnyń bala kútimi boıynsha járdemaqy merzimi uzartyldy», - dep málim etti Dámejan Sadýaqasova.

Qosa ketsek, buǵan deıin Qazaqstanda bala kútimi boıynsha járdemaqy alatyndardyń zeınetaqy jarnalary sýbsıdııalanatynyn habarlap edik.