4,4 mlrd. teńgege salynǵan 75 veterınarlyq zerthana qańyrap bos tur - Nursultan Nazarbaev
ASTANA. QazAqparat - 4,4 mlrd. teńgege salynǵan 75 veterınarlyq zerthana qańyrap bos tur. Bul týraly búgin Úkimettiń keńeıtilgen májilisinde Qazaqstan Prezıdenti Nursultan Nazarbaev aıtty, dep habarlaıdy QazAqparat.
«Máselen 3 jyl boıy 4 ,4 mlrd. teńgege salynǵan 75 aýdandyq veterınarlyq zerthanalardyń ekinshi qabattary qańyrap bos tur. Áli esimde, burynǵy mınıstr (Aýyl sharýashylyǵy mınıstri Asyljan Mamytbekov) zerthana bolmasa maldy sata almaımyz dedi. Aqshany berdik. Mine, 75 veterınarlyq zerthana toqtap tur. Asqar (Aýyl sharýashylyǵy mınıstri Asqar Myrzahmetov) baıqaısyń ba, olar jumys istemeıdi. Biz qyrǵyzdardan zerthana surap otyrmyz, al ózimizdiki toqtap tur»,- dedi Qazaqstan Prezıdenti.
Memleket basshysy 2016 jyldyń sońynda jalpy quny 20 mlrd. teńgeni quraıtyn Almaty-Taldyqorǵan gaz qubyrynyń salynǵanyn aıtty.
«Esep komıtetiniń málimetinshe, ol gaz taratý jelisiniń bolmaýy saldarynan jumys istemeı tur. Solaı ma, Amandyq?», - dep surady Nursultan Nazarbaev Almaty oblysynyń ákimi Amandyq Batalovtan.
«Nursultan Ábishuly, 55 shaqyrymyna qarjy bólinbep edi. Ótken jyly bólinip, qazir bitirdik. Ózimiz jergilikti bıýdjetten 4 mlrd. teńge bólip, gaz taratý jelisiniń birinshi kezeńin salýdamyz», - dedi oblys basshysy.
Óz kezeginde elimizdiń Energetıka mınıstri Qanat Bozymbaev Taldyqorǵanǵa gaz tartý jumystary Eýropalyq Qaıta qurý jáne Damý banki, «GazTransAımaq» jáne jeke qarajat esebinen júrgiziletindigin aıtty.
«Mundaı jospar bar. 2 jyldyq ishinde bul jumysty aıaqtaımyz dep josparlaýdamyz. Jalpy, gaz taratý jelisiniń birinshi kezeńin bıyl aıaqtasaq Taldyqorǵanǵa gaz berile bastaıdy», - dedi mınıstr.
«Úkimetke memleket qarajatyna nemquraıly, qylmystyq jolmen qaraý faktilerin anyqtaý úshin arnaıy komıssııa qurýdy tapsyramyn»,- dedi Prezıdent.
