3G standarty kelesi jyly respýblıkanyń barlyq óńirlerin qamtıtyn bolady - A. Jumaǵalıev
ANA. 6 jeltoqsan. QazAqparat /Qanat Mámetqazyuly/ - Búgin QR Parlamenti Májilisinde 2010-2014 jyldarǵa arnalǵan Qazaqstan Respýblıkasyndaǵy aqparattyq-kommýnıkatsııalyq tehnologııalardy damytý baǵdarlamasy taqyrybynda Úkimet saǵaty bolyp ótti.
Onda QR Aqparat jáne baılanys mınıstri Asqar Jumaǵalıev baıandama jasady.
Mınıstrdiń aıtýyna qaraǵanda, 2010-2014 jyldarǵa arnalǵan aqparattyq tehnologııalardy damytýdyń salalyq baǵdarlamasynyń negizgi maqsaty elimizdiń aqparattyq qoǵamǵa jáne ınnovatsııalyq ekonomıkaǵa kóshýi úshin aqparattyq-kommýnıkatsııalyq salany damytý tetikteri men jaǵdaıyn qalyptastyrý bolyp tabylady. «Búgingi kúni baǵdarlama boıynsha negizgi jeti baǵyt anyqtalyp otyr. Atap aıtsaq, bular - aqparattyq-kommýnıkatsııalyq ınfraqurylymdy damytý, ınternet jelisiniń qazaqstandyq kontentin ulǵaıtý, elektrondyq qyzmetterdi, elektrondyq úkimetti damytý, sandyq telehabarlardy engizý, aqparattyq kommýnıkatsııa salasynda bilim berýdi arttyrý jáne joǵary tehnologııalyq tehnıka óndirisine baǵdarlama ázirleý men qyzmetterdi damytý bolyp tabylady», - degen mınıstr A. Jumaǵalıev osy baǵyttar boıynsha jeke-jeke toqtalyp ótti.
Onyń aıtýyna qaraǵanda, baǵdarlamanyń birinshi baǵyty, ıaǵnı aqparattyq-kommýnıkatsııalyq ınfraqurylymdy damytý baǵytynda aǵymdaǵy jyly «ngn» tehnologııasyn engizýdiń birinshi kezeńi aıaqtalǵan. Budan bólek, wimax tehnologııasyn damytý sharalary da atqarylyp keledi. Bul rette 3G standarty jaqynda elordada iske qosylǵanyna toqtalǵan mınıstr, atalǵan standarttyń kelesi jyly respýblıkanyń barlyq óńirlerin qamtıtynyn atap ótti. «Astana jáne Almaty qalalarynda 4 G tehnologııasy testilik rejımnen ótýde», - dedi A. Jumaǵalıev.
