3D formatyndaǵy «Orteke» mýltfılmi kórermenge jol tartpaq
ASTANA. QazAqparat - Astana qalasynda anımatsııamen kásibı aınalysatyn ortalyq jumys istep jatyr.
Qurylǵanyna áli bir aı bolmaǵan anımatsııalyq ortalyq bul kúni birneshe 3D formatyndaǵy mýltfılmderdi jasaýdy bastap ketken eken.
«Astana qalasyndaǵy Qazaq ulttyq óner ýnıversıtetindegi (Shabyt) oqýymdy aıaqtap, Qazaqfılmniń «Jeruıyq» fılminiń tusirilimine qatysqan edim. Keıin Qytaıǵa baryp, birneshe anımatsııalyq kompanııalarda jumys istedim. Sol kezde Qytaıdaǵy qazaq jastarynyń týyndysy - «Abaıdyń balalyq shaǵy» mýltfılminiń alǵashqy serııalaryn jasaýǵa atsalystym», - dedi ortalyq dırektory Qasıet Sahıollauly QazAqparat tilshisine bergen suhbatynda.
«Ortalyqtyń mamandarynyń kópshiligi - Qytaıdan kelgen joǵary bilikti qazaq jastary. Olar Qytaıdaǵy Beıjiń, Úrimji qalalary jáne Anhoı provıntsııasynda anımatsııa mamandyǵy boıynsha bilim alyp, birneshe jyl qytaılyq kompanııalarda jumys istegen. Anımatsııa salasynyń ár qyryn meńgergen osy jastardy biriktirip, qazaqsha mýltfılmderdi damytý ushin Astana qalasynda «Qazart media» ortalyǵyn ashtyq. Aldaǵy ýaqytta sapaly qazaqsha mýltfılmder daıyndaıtyn bolamyz», - dep atap ótti Qasıet Sahıollauly.
Ortalyq dırektory 3D formatyndaǵy «Orteke» avtorlyq mýltfılminiń jaqyn arada jaryq kóretinin, sonymen qatar kınofılm effektilerin jasaýmen aınalysýdy kózdep otyrǵanyn da jetkizdi. «Orteke» Táýelsiz Qazaqstandaǵy alǵashqy mýzykalyq anımatsııa bolmaq.
