3D formatyndaǵy alǵashqy qazaqstandyq fılm kóktemde jaryq kóredi
ALMATY. 2 qańtar. QazAqparat /Elena Ilınskaıa/ - Jaqynda úlken ekranǵa 3D formattaǵy alǵashqy qazaqstandyq fılm shyǵady.
Sh.Aımanov atyndaǵy «Qazaqfılm» aktsıonerlik qoǵamy men «Báıterek» ulttyq prodıýserlik ortalyǵy birlesip túsirgen rejısser Egor Mıhalkov-Konchalovskııdiń fılmi «A-ǵa oralý» dep atalady. Bul týraly «Qazaqfılmniń» baspasóz qyzmetinen habarlady.
Fılm «Eskendir Zulqarnaıynnyń júrgen joldarymen» dep atalatyn derekti fılm túsirý úshin Almatydan Astanaǵa attanatyn kınotúsirýshiler toby týraly baıandaıdy. Olarǵa bul saparda kezinde Aýǵanstanda soǵysqan, sonda aıaǵynan aırylǵan azamat jolserik bolady. Biraq álgi jolseriktiń kezinde KSRO Bas barlaý basqarmasynyń musylman batalonynda, aty ańyzǵa aınalǵan Qara maıordyń qolbasshylyǵynda qyzmet etkenin jáne onyń Aýǵanstanǵa oralýynyń óz sebebi bar ekenin eshkim bilmeıdi. Oqıǵa osy keıipkerdiń tóńireginde órbıdi.
Fılmdi túsirýshilerdiń aıtýynsha, ony 3D formatta shyǵarý týraly usynysty kınoprokatshylar jasaǵan. Olar jańa formatta túsirilgen fılmniń kórermenderdiń kóńilinen shyǵatynyna senimdi.
Qazir kınokartına 3D formatqa aýystyrylýda, bul naýryz aıynda aıaqtalyp qalady. «A-ǵa oralý» fılmin qazaqstandyq kınematograftyń serpindi jobasy dep aıtýǵa bolady, deıdi mamandar.
