391 otbasy meıramdy jańa páterde qarsy aldy
ASTANA. QazAqparat - «Shırek ǵasyrdan sál ǵana az ýaqytta Qazaqstan egemendi ulttyq ekonomıkasyn quryp, halyqaralyq qaýymdastyqqa tereńinen kirigip, álemdik ulttar otbasynyń tolyq múshesine aınaldy. Biz halyqpen birge kóp synaqtardy bastan keshtik, odan shynyǵa tústik.
Biz osy jyldary tabysty ekonomıkalyq damýdyń qarqyny jóninen buryn-sońdy bolmaǵan jetistikterge qol jetkizdik. Bizdiń halqymyz eshqashan búgingideı baqýatty tirlik keship kórgen joq»,- dep málimdedi Memleket basshysy Nursultan Nazarbaev Qazaqstan halqyna Joldaýynda.
Elbasynyń sóziniń dálelindeı, daǵdarysqa qaramastan ótken jyly myńdaǵan qazaqstandyqtar ulttyq meıramymyz - Táýelsizdik kúnin jańa páterlerinde qarsy aldy. «Qazaqstandyq ıpotekalyq kompanııa» AQ-y «Nurly jol» baǵdarlamasy aıasynda elimizdegi eki qalada áleýmettik jalǵa beriletin baspanalardy ıelerine tapsyrdy. «Báıterek» holdınginiń baspasóz qyzmeti habarlaǵandaı, meıramnyń aldynda Astana men Qyzylorda qalalarynda jalpy aýdany 21,6 myń sharshy metrdi quraıtyn 391 páter paıdalanýǵa berildi. Atap aıtqanda, Astanadaǵy Qobylandy kóshesindegi turǵyn úıdegi 161 páter (jalpy aýdany 8,2 myń sharshy metr), Qyzylordadaǵy Shúkirov kóshesindegi turǵyn úıdegi 230 páter (jalpy aýdany 13,4 myń sharshy metr) óz ıelerin tapty.
«Paıdalanýǵa berilgen nysandardy senimdi qurylys kompanııasy turǵyzdy. Biz qurylystyń sapasyn únemi baqylaýda ustadyq. 20 jylǵa satyp alý quqymen jalǵa beriletin páterlerdiń jaldyq quny ár sharshy metrge aı saıyn 1120 teńgeni quraıdy. Bul mundaı sapadaǵy úı úshin aıtarlyqtaı kóńilge qonymdy baǵa ekeni daýsyz»,- dep málimdedi Astanadaǵy saltanatty rásimde «Qazaqstan ıpotekalyq kompanııasy» AQ-nyń basqarma tóraǵasynyń orynbasary Qudaıbergen Beısembaev. Kompanııa taratqan aqparatqa súıensek, búgingi kúnge deıin jalpy aýdany 353 myń sharshy metrdi quraıtyn Astana, Almaty, Shymkent, Aqtóbe, Qostanaı, Kókshetaý, Semeı, Pavlodar, Qaraǵandy, Taraz, Qyzylorda, Taldyqorǵan, Aqtaý qalalaryndaǵy 6 myńnan astam páterler paıdalanýǵa berilgen.
Buǵan qosa, «Báıterek» holdıngi páterlerdi jalǵa alǵan azamattardyń qarjylyq júktemesin azaıtý úshin, Salyq kodeksine túzetý engizý baǵytynda is-sharalar atqardy. Osy túzetýlerge sáıkes, 2016 jyldan bastap páterlerdi jalǵa alýshylar múlik salyǵyn azamattyq tulǵalarmen birdeı mólsherlemede tóleýge múmkindik aldy. ıAǵnı, salyq mólsherlemesi 1,5 paıyzdan 0,25 paıyzǵa deıin tómendetilgen. Atap aıtarlyǵy, jalǵa beriletin páterlerdi memlekettik qyzmetkerler, bıýdjettik mekemelerdiń jumysshylary, jergilikti atqarýshy organdarda úıdiń kezeginde turǵandar, kóp balaly jáne múgedek balasy bar otbasylar, múgedek balalar, ata-anasynyń qamqorlyǵynsyz qalǵan balalar, tolyq emes otbasylar, áskerı qyzmetkerler alýǵa quqyly. Olarǵa jaldamaly baspana eshqandaı alǵashqy jarnany tólemeı, 20 jylǵa deıin satyp alý quqymen beriledi. Qarajaty jetkilikti bolǵan jaǵdaıda, 5 jyldan keıin jaldamaly páterin jekemenshigine satyp alady.
