390 myńnan astam adam «Emdeýge jatqyzý bıýrosy» portalynyń qyzmetin paıdalandy
ASTANA. 21 maýsym. QazAqparat - Biryńǵaı memlekettik densaýlyq saqtaý ulttyq júıesiniń aıasynda «Emdeýge jatqyzý bıýrosy» portaly qyzmet etýde.
Statsıonardyń, emhana men naýqastyń arasyndaǵy ózara is-qımyldy qamtamasyz etý, sondaı-aq naýqastarǵa dáriger men emhanany erkin tańdaý quqyn berýdi maqsat etken bul portaldyń qyzmetin 2012 jyldyń 5 aıynda 390 myńnan astam qazaqstandyq paıdalanǵan, dep habarlady pm.kz saıty.
Densaýlyq saqtaýdy damytý respýblıkalyq ortalyǵynyń aqparaty boıynsha, aǵymdaǵy jyldyń 5 aıynda «Emdeýge jatqyzý bıýrosy» portalynyń qyzmetin 390 myńnan astam qazaqstandyq paıdalanǵan, bul ótken jyldyń sáıkes kezeńindegi kórsetkishten 6 myńǵa kóp. Portal qyzmetine júgingenderdiń 90,5 paıyzy nemese 353 324 naýqas elimizdiń statsıonarlaryna emdeýge jatqyzylǵan.
Taǵy bir aıta ketetin jaıt, emdeýge jatqyzylǵandardyń sany ótken jyldyń sáıkes kezeńindegi kórsetkishten 4,1 paıyzǵa joǵary. Derekkózge súıensek, qazaqstandyqtardyń 85,2 paıyzy jergilikti emhanalarda emdelýdi jón kóredi, naýqastardyń 13,2 paıyzy ǵana respýblıkalyq deńgeıdegi mekemelerde emdelgen.
«Emhanaǵa jatqyzý kórsetkishiniń eń joǵary úles salmaǵy (95 paıyzdan astamy) Qostanaı, Jambyl jáne Batys Qazaqstan oblystarynda tirkelip otyr jáne emhanaǵa jatýǵa joldama berilgen aýyl turǵyndarynyń úlesi 43,8 paıyzdy quraıdy», - delingen Densaýlyq saqtaýdy damytý respýblıkalyq ortalyǵynyń habarlamasynda.
Qazirgi tańda portaldyń jumysyna emhanaǵa josparly jatqyzýmen aınalysatyn elimizdiń barlyq densaýlyq saqtaý mekemeleri jumyldyrylyp otyr. Bul sharalar halyqqa «Salamatty Qazaqstan» baǵdarlamasynyń aıasynda usynylatyn medıtsınalyq qyzmettiń qoljetimdiligi men ashyqtyǵyn qamtamasyz etip, naýqastardyń medıtsınalyq uıym tańdaý quqyǵyn paıdalanýyna múmkindik beredi.
