39 bala ýlanǵan poıyz meıramhanasynyń dırektory men aspazshysy 1 jylǵa sottaldy
ASTANA. 13 qańtar. QazAqparat - 39 bala ýlanǵan poıyz meıramhanasyna qatysty sot úkimi shyqty. Bul týraly QR Bas kólik prokýratýrasynan habarlady.
Esterińizge sala keteıik, 2011 jyly shilde aıynyń sońynda 8 jáne 14 jas aralyǵyndaǵy 39 bala Almaty qalasyndaǵy «Altaır» lagerinen Atyraýǵa qaıtyp bara jatqan edi. Balalar jolda №41 «Almaty -Atyraý» jolaýshylar poıyzynyń meıramhanasynan tamaqtanǵan. Poıyz Túrkistan beketinen ótkennen keıin, tárbıeshi balalardyń jaǵdaıy álsiregenin baıqap, dárigerlerdiń kómegine júgindi. Balalar Belkól beketinen Qyzylorda oblysynyń juqpaly aýrýlar aýrýhanasyna jetkizilgen bolatyn.
Tekserý amaldary balalardyń ýlanýyna vagon meıramhanasynyń dırektory M.Bodıev pen aspazshy S.Ásemhanovanyń sanıtarlyq-epıdemıologııalyq talaptardy óreskel buzýy sebep bolǵanyn anyqtady.
2011 jyldyń 22 jeltoqsanynda Qyzylorda qalasynyń sot úkimimen M.Bodıev jáne S.Ásemhanova kináli dep tanylyp, 1 jylǵa bas bostandyqtarynan aıryldy. Úkim óz kúshine endi.
