385 talapker tyıym salynǵan zattardy alyp kirmek bolǵany úshin UBT-dan shettetildi
ASTANA. KAZINFORM – 2026 jyldyń 10 mamyrynda bastalǵan negizgi UBT 292 myńǵa jýyq ret tapsyryldy. Talapkerlerdiń 72%-y testileýdi qazaq tilinde, 28%-y orys tilinde jáne 469 ret aǵylshyn tilinde tapsyrdy.
Altynshy aptanyń qorytyndysy boıynsha talapkerlerdiń 68%-y shekti ball jınady. Bes pán boıynsha ortasha ball - 64. Eń joǵary nátıje – 140 ball, ony Pavlodar oblysynyń túlegi Áset Altaır jınady.
Erekshe bilim berý qajettilikteri (EBQ) bar oqýǵa túsýshiler úshin qolaıly jaǵdaı jasaýǵa erekshe kóńil bólinedi. UBT-ǵa EBQ bar 735 talapker qatysty.
Talapkerlerdiń test tapsyrmalarynyń mazmuny boıynsha testileý aıaqtalǵannan keıin 30 mınýt ishinde apellıatsııaǵa berý quqyǵy bar. Tehnıkalyq sebepter boıynsha apellıatsııa tikeleı testileý kezinde qabyldanady. Nátıjeleri bar sertıfıkattar apellıatsııa qarastyrylǵannan keıin jeke kabınetterde qoljetimdi bolady.
UBT-ny ótkizýdiń alty aptasynda 624 ereje buzýshylyq anyqtaldy. 385 talapker smartfondardy, smart kózildirikterdi, mıkro qulaqqaptardy, shpargalkalardy jáne basqa da tyıym salynǵan zattardy alyp kirmek bolǵany úshin testileýden shettetildi. Taǵy 238 adam testileý kezinde erejelerdi buzǵany úshin aýdıtorııadan shyǵaryldy, olardyń nátıjeleri joıyldy. Beınejazbalardy tekserýden soń ereje buzǵan 1 adamnyń nátıjesi joıyldy. Ózge adamdardyń ornyna kirý faktileri anyqtalǵan joq.
2026 jylǵy UBT aıaqtalǵannan keıin kúntizbelik jyldyń 31 qazanyna deıin beınejazbalarǵa taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda UBT nátıjeleri joıylady.
Esterińizge sala ketsek, 240 myńǵa jýyq talapker testileýge qatysýǵa eki múmkindikti esepke alǵanda 446 myńnan astam ótinish bergen.
Aıta ketelik negizgi UBT kezinde 300-ge jýyq talapker testileýden shettetilgen edi.
