385 mlrd teńgelik joba: eki ret vıza ala almaǵan qytaılyq ınvestorǵa prokýratýra kómektesti
ASTANA. KAZINFORM — Aqmola oblysynda quny 385 mlrd teńge bolatyn ınvestıtsııalyq jobany júzege asyryp jatqan qytaılyq kompanııa bas dırektory ınvestorlyq vızany eki ret ala almaǵan. Bul týraly Prokýratýra málim etti.
Qytaılyq Dalian Hesheng Holdings kompanııasy Aqmola oblysynda «Azııa Altyn Dan» JShS-men birlesip, quny 385 mlrd teńge bolatyn iri ınvestıtsııalyq jobany júzege asyryp jatyr.
— Joba aıasynda shamamen 800 jumys ornyn qurý kózdelgen. Alaıda sheteldik kompanııanyń bas dırektorynyń Qazaqstanda jumys isteýine qajetti ınvestorlyq vızany rásimdeý týraly ótinishi eki ret quptalmaǵan.Osyǵan baılanysty ınvestor Aqmola oblysynyń prokýratýrasyna júgingen, — delingen habarlamada.
Prokýratýra ýákiletti memlekettik organdarmen jumys júrgizip, máseleni retteýge yqpal etti. Nátıjesinde Dalian Hesheng Holdings kompanııasynyń bas dırektory úshin ınvestorlyq vıza rásimdeldi.
Endi kompanııa basshysy Qazaqstanda bolyp, zaýyt qurylysy men ınvestıtsııalyq jobanyń iske asyrylý barysyn jeke ózi baqylaı alady. Investorlyq vızanyń rásimdelýi kompanııa basshysyna jobany júzege asyrýǵa tikeleı qatysýǵa, zaýyt qurylysyn baqylaýǵa jáne týyndaıtyn máselelerdi jedel sheshýge múmkindik beredi.
Aqmola oblysynyń prokýratýrasy ınvestorlardyń quqyǵyn qorǵaý jáne ınvestıtsııalyq jobalardy iske asyrýǵa kedergi keltirýi múmkin ákimshilik tosqaýyldardyń aldyn alý baǵytyndaǵy jumysty jalǵastyra bermek.
Buǵan deıin Qyzylordada kásipkerdiń qyzmetine zańsyz aralasqan SES basshysy jazalanǵanyn jazǵan edik.
