380 adam Sirius Energy qarjy pıramıdasynyń qurbany boldy

ASTANA. KAZINFORM – QMA Astana qalasy boıynsha departamenti «Sirius Energy» qarjy pıramıdasynyń qurylymdyq bólimshesin basqarý faktisi boıynsha tergeý júrgizip jatyr.  

Uıymdastyrýshy ózin chılılik «Sirius Energy» kompanııasynyń ókili retinde tanystyryp, azamattardy jańartylatyn energııa kózderi salasyndaǵy joǵary tabys ákeletin jobalarǵa ınvestıtsııa salýǵa úgittegen.

Qarajat tek USDT krıptovalıýtasy arqyly qabyldanyp, keıin qatysýshylarǵa shartty bonýstar kórsetiletin jeke kabınetter ashylǵan.

Salymshylardy tartý maqsatynda kúdikti Almaty jáne Astana qalalarynda keńse ashyp, turaqty túrde trenıngter ótkizgen.

— Sonymen qatar Instagram jáne TikTok áleýmettik jelileri arqyly belsendi jarnama júrgizip, zańdy qyzmet atqaryp otyrǵandaı áser qalyptastyrý úshin úshinshi tulǵanyń atyna JShS tirkegen. Alaıda is júzinde eshqandaı qyzmet kórsetilmegen, — delingen QMA habarlamasynda.

Saldarynan 380 azamat qarjy pıramıdasynyń qurbanyna aınalǵan.

Jábirlenýshilerdiń biri uıymdastyrýshynyń joǵary tabys týraly ýádesine senip, jobaǵa ınvestıtsııa salý úshin 3 mln teńge kóleminde nesıe rásimdegen.

Alaıda eshqandaı tólem jasalmaǵan, endi ol nesıeni paıyzymen birge óz qarajatynan óteýge májbúr.

Sot sanktsııasymen uıymdastyrýshynyń bank shottaryna tyıym salyndy.

Tergeý múddesine baılanysty ózge aqparat jarııalanbaıdy. 

Aıta ketelik «S-Group» qarjy pıramıdasy 136 mln teńgeden astam zalal keltirgeni týraly jazǵan edik.