38 jastaǵy áıel Lývr urlyǵyna qatysy bar degen kúdikke ilindi

ASTANA. KAZINFORM – Lývr urlyǵyna qatysty kúdiktilerdiń biri retinde áıel adam qamaýǵa alyndy, dep habarlaıdy Kazinform agenttiginiń tilshisi.

Parıjdegi Lývr mýzeıine jasalǵan urlyq boıynsha ustalǵan 5 adamnyń biri resmı túrde aıyptaldy. Bul týraly Frantsııanyń BFMTV telearnasy habarlady. 

Frantsııalyq aqparat quraldarynyń málimetinshe, aıyp taǵylǵan 38 jastaǵy áıel uıymdasqan qylmystyq toptyń múshesi bolǵany úshin tergeý ızolıatoryna qamaldy. Sot sheshimi jarııalanǵan sátte ol kózine jas aldy. 

Urlyq isi boıynsha taǵy bir kúdiktige de 1 qarasha kúni resmı aıyp taǵyldy. Ol uıymdasqan toppen birlesip urlyq jasaý áreketi boıynsha tergelip jatyr. Parıj prokýratýrasynyń dereginshe, bul adam buǵan deıin de isti bolǵan. 

– Kúdikti sotty keıinge qaldyrýdy surady. Ol tergeý ótkenge deıin ýaqytsha qamaýda bolady, - dep túsindirdi Parıj prokýrory Lora Bekko. 

Prokýror beısenbi kúni tańerteń osy iske baılanysty taǵy 5 adamnyń ustalǵanyn málimdedi. Degenmen urlanǵan áshekeı buıymdary áli tabylǵan joq. Keıin ustalǵandardyń úsheýi bosatyldy.

Osy iske baılanysty aldymen 34 jáne 39 jastaǵy eki kúdikti 25 qazan kúni qolǵa túsip, qamaýǵa alynǵan. Tergeý barysynda olar «Apollon galereıasyna» kirip, zergerlik buıymdardy urlamaq bolǵandaryn jartylaı moıyndaǵan. 

Jalpy barlyǵy 8 zat qoldy bolǵan. Olardyń arasynda Marııa-Lýıza kollektsııasyndaǵy alqa men syrǵa, Marııa-Amelııa jáne Gortenzııa toptamalarynan alynǵan alqa, syrǵa jáne táj bar. Sondaı-aq ımperatrıtsa Evgenııaǵa tıesili kollektsııadan eki brosh (onyń biri – relıkvarıı broshy), korsajǵa taǵatyn bantık jáne táj joǵalǵan.  

Tergeý málimetinshe, ustalǵandar urlyqtan keıin Aljırge ushýdy josparlaǵan. Olar Parıjdiń mańyndaǵy, Taıaý Shyǵystan shyqqan mıgranttar kóp turatyn aýdanda ustalǵan.