38 mln teńge aıyppul: Shymkentte 4500-ge jýyq jolaýshy qoǵamdyq kólikte jolaqy tólemegen
ShYMKENT. KAZINFORM – Búginde Shymkent qalasynda 1150 qoǵamdyq kólik bar. Onyń ishinde 151 avtobýs úsh jylǵa deıingi, 954-i jeti jylǵa deıingi, al 45-i jeti jyldan asqan kólikter qataryna jatady.
Qalalyq jolaýshylar kóligi jáne avtomobıl joldary basqarmasynyń málimetine súıensek, shaharda qoǵamdyq kólik parkin jańartý jumystary jalǵasyp keledi.
– Ótken jyly tasymaldaýshy kompanııalar tarapynan 88 jańa avtobýs satyp alyndy. Bıylǵy jyldyń alǵashqy tórt aıynda taǵy 17 avtobýs jetkizildi. Jyl sońyna deıin qosymsha 200 avtobýs satyp alý josparlanǵan, – delingen basqarma usynǵan aqparatta.
Vedomstvo dereginshe, qalada qoǵamdyq kólik qyzmetin paıdalanatyn jolaýshylar sany artyp keledi. Máselen, 2024 jyly qoǵamdyq kólikpen 80,1 mln jolaýshy tasymaldansa, 2025 jyly bul kórsetkish 95,3 mln adamǵa jetken. Al 2026 jyldyń alǵashqy toqsanynda 27 mln jolaýshy tasymaldanyp, ótken jyldyń sáıkes kezeńimen salystyrǵanda 40%-ǵa artqan.
Soǵan qaramastan qoǵamdyq kólikte jolaqy tólemeý jaǵdaılary tyıylmaı tur. Bıylǵy jyldyń alǵashqy toqsanynda jolaqy tólemegen 4474 jolaýshyǵa ákimshilik hattama toltyrylyp, árqaısyna 2 AEK mólsherinde, ıaǵnı 8650 teńge aıyppul salyndy. Jalpy óndirilgen aıyppul kólemi – 38 mln teńge.
Budan bólek jolaqyny qolma-qol qabyldaǵan 380 júrgizýshi anyqtalǵan. Shymkent qalasynyń kóliktik baqylaý ınspektsııasy olardyń 228-ine qatysty ákimshilik hattama rásimdep, árqaısysyna 5 AEK mólsherinde (21 625 teńge) aıyppul salǵan. Jalpy aıyppul somasy – 4,9 mln teńge.
Aıta keteıik, qazirgi tańda Shymkent qalasynda 83 turaqty marshrýtta kún saıyn 988 avtobýs jolaýshylarǵa qyzmet kórsetedi. Onyń 79-y áleýmettik mańyzy bar baǵyt retinde sýbsıdııalanady. Qalaishilik tasymaldy 14 kólik kompanııasy shart negizinde júzege asyryp otyr.
Budan buryn 2026 jyly Shymkentte qoǵamdyq kóliktegi jolaqy quny 70 teńgeden 120 teńgege deıin ósýi múmkin ekeni habarlanǵan bolatyn.
