3,8 myńnan astam medıtsına qyzmetkeri smart-beınejeton taǵady
ASTANA. KAZINFORM — Jyl sońyna deıin 3,8 myńnan astam medıtsına qyzmetkeri men 2,1 myń jedel járdem brıgadasy smart-beınejetondarmen jabdyqtalady, dep habarlaıdy Úkimettiń baspasóz qyzmeti.
— Qazaqstanda medıtsına qyzmetkerlerin qorǵaý jáne medıtsınalyq kómektiń qoljetimdiligin arttyrý úshin tsıfrlyq sheshimder engizilip jatyr. Atap aıtqanda, polıtsııamen shuǵyl baılanys ornatýǵa arnalǵan smart-beınejetondar men SOS batyrmalary, vaktsınalardyń saqtalý jaǵdaıyn baqylaýǵa arnalǵan «Sýyq tizbek» júıesi, sondaı-aq aýyldyq jerlerdegi 655 medıtsınalyq uıym men QAJ júıesiniń 72 mekemesinde ornatylǵan telemedıtsınalyq keshender qoldanysqa engizildi, — delingen habarlamada.
«Qazaqtelekom» ókili Bahtııar Qojahmetovtyń aıtýynsha, jyl sońyna deıin 2,1 myń jedel járdem brıgadasy men 3,8 myńnan astam qyzmetkerdi beınejetondarmen qamtý josparlanyp otyr. Al telemedıtsına qashyqtan 24-ke deıin zertteý túrin júrgizýge múmkindik beredi.
Buǵan deıin Kókshetaýda feldsherdi balaǵattaǵandar 10 táýlikke deıin qamaýǵa alynǵanyn jazǵanbyz.
