№38 mektep-lıtseıde «Syńǵyrla, kúmis qońyraý» atty saltanatty shara bolyp ótti - Astana
ASTANA. QazAqparat - Astanadaǵy №38 mektep-lıtseıinde Bilim kúnine arnalǵan «Syńǵyrla, kúmis qońyraý» atty saltanatty shara bolyp ótti.
Bul rásim Memlekettik Ánurannyń shyrqalýymen bastaldy.
Mektep-lıtseıdiń dırektory Jamal Bazarqulqyzy Qasymbek óz sózinde búgingi alǵashqy qońyraý saltanaty osy bilim ordasynyń 15 jyldyq mereıtoıymen tuspa-tus kelip otyrǵanyn aıtty. «1999 jyly 1 qyrkúıek kúni Elbasy Nursultan Ábishuly Nazarbaev kelip, mektepti ashý saltanatyna qatysqany áli kúnge deıin kóz aldymyzda. Mektep tabaldyryǵyn alǵash attaǵaly turǵan baldyrǵandardy kórip, Elbasy «Osy balalardyń bári de birinshi synypqa bara ma?» dep suraǵan bolatyn. Memleket basshysy oqýshylarǵa óz tilegin bildirip, Qazaq eliniń bolashaǵy balalar ekenin, memleketimiz damýy úshin olardyń jaqsy bilim alýy tıis ekenin aıtqany da esimizde. 15 jyldyń ishinde mektebimiz bilim berý salasynda úzdik kórsetkishterge qol jetkizip keledi. Respýblıkadaǵy úzdik mektep atandy. Bıylǵy túlekterimizdiń túgelge jýyǵy memlekettik grantqa ıe bolyp, joǵary oqý oryndaryna tústi. Al jańa oqý jylynda 250-ge jýyq bala mektep tabaldyryǵyn attaǵaly tur. Báriniń de oqýda alda bolýyn, bıik belesterdi baǵyndyrýyn tileımin»,- dedi ol.
Kelesi kezekti bilim ordasynyń qurmetti qonaǵy bolyp osy sharaǵa qatysqan QR Bilim jáne ǵylym mınıstrligi Ǵylym komıteti tóraǵasynyń orynbasary Amandyq Tóleshov sóz aldy. Ol búgin elimizdiń barlyq mektebinde alǵashqy qońyraý soǵylyp, baldyrǵandar bilim uıalaryna baryp jatqanyn aıta kelip, mektep-lıtseıdiń ujymyna, oqýshylarǵa izgi tilegin jetkizdi.
Saltanatty sharada ustaz ben bilim uıasyna arnalǵan ánder shyrqaldy.
