38 magnıt monshaǵyn jutyp qoıǵan almatylyq bala tamaq ishe bastady
ALMATY. QazAqparat - Almatyda Balalarǵa shuǵyl kómek kórsetý ortalyǵynyń dárigeri 38 magnıt monshaǵyn jutyp qoıǵan 5 jasar balanyń jaǵdaıy týraly aıtyp berdi, dep habarlaıdy QazAqparat tilshisi.
Mamandardyń aıtýynsha, balanyń beti beri qaraı bastaǵan. Ota jasalǵan soń 2-3 kún bala jansaqtaý bóliminde jatty. Osy ýaqyt aralyǵynda ishegindegi jaraqatqa baılanysty qorekti tamyr arqyly alyp kelgen.
«Balanyń jaǵdaıy birqalypty jaqsy. Aqyryndap ezilgen tamaq ishe bastady. Áli 3-4 kún bólimshede jatady. Eger barlyq taldaýlary durys bolsa, bala úıine jiberiledi», - dedi Ortalyqtyń shuǵyl hırýrgııa bóliminiń meńgerýshisi Erdan Meńdiǵalıev.
Atalǵan ortalyq dárigerleri sońǵy 5 jylda 15 balanyń ómirin arashalap qalǵan.
Dárigerler almatylyq balalardyń isheginen túıreýish, ıne, tıyn, saǵat batareıalaryn, shege, burandy alyp shyqqan.
«Bógde zattardyń kópshiligi ishek jolyna barsa, qalǵany ókpege de ketip qalady», - dedi E.Meńdiǵalıev.
Maman 10 jasqa tolmaǵan balasy bar ata-analarǵa óte muqııat bolýdy eskertti.
«Qazirgi usaq oıynshyqtar, tipti Lego sııaqty usaq oıynshyqtar motorıkany, balanyń ustap sezý qabiletin damytady. Biraq, olardy 10 jasqa deıingi balaǵa bergende óte muqııat bolý kerek», - dedi dáriger.
Ótken jumada Almatyda 5 jasar bala ishegi túınep aýrýhanaǵa túsken bolatyn. Jedel ota barysynda dárigerler onyń isheginen 37 magnıt monshaqtaryn alyp shyqqan.
