379 adam dáriger kómegine júgindi: Túrkistanda ıt pen mysyqtan zardap shekkender kóbeıgen

TÚRKІSTAN. KAZINFORM – Túrkistan qalasynda ótken jyly 374 adam ıt, mysyqtan jaraqattansa, bıyl jyl basynan beri 379 adam zardap shegip, medıtsınalyq kómekke júgingen.

Túrkistandaǵy Qoja Ahmet ıAsaýı kesenesine jaqyn ornalasqan iri saıabaqtardyń biri — «Tuńǵysh Prezıdent» saıabaǵynda qańǵybas ıtter kóbeıip ketken. Osy jaǵdaıǵa baılanysty Kazinform agenttiginiń tilshisi joldaǵan saýalǵa Túrkistan oblysynyń veterınarııa basqarmasy jaýap berdi.

— «Tuńǵysh Prezıdent» saıabaǵy aýmaǵynan «109» biryńǵaı baılanys ortalyǵyna qazirgi tańǵa deıin 16 ótinim tirkelip, 192 qańǵybas ıt, mysyq aýlandy. Veterınarııa basqarmasynyń uıymdastyrýymen qala turǵyndarynan ótinimderdiń kóptep tirkelýine jáne qalaǵa kelýshi qonaqtardyń artýyna (vızıt) baılanysty, shaharǵa jaqyn ornalasqan aýdan, qalalardan kelgen ańshy brıgadalar 6 ret, Túrkistan qalalyq fılıalynyń aýlaý qyzmeti tarapynan 16 reıdtik is-shara uıymdastyryldy. Nátıjesinde 744 bas qańǵybas ıt, mysyq aýlandy, — delingen oblystyq veterınarııa basqarmasynyń bizge usynǵan jaýabynda.

Basqarma málim etkendeı, qańǵybas ıtterdi aýlaý qyzmetin júrgizýshi mekeme — Túrkistan oblystyq veterınarııa basqarmasynyń «Veterınarııalyq qyzmeti».

Jalpy bıyl Túrkistan qalasynda 6 295 qańǵybas ıt, mysyqty aýlaý josparlanyp, qazirgi tańda 7657-i ustalynyp, joıylǵan. Onyń ishinde aýlanǵan 539 úı janýarlary Saýran aýdanyndaǵy Shornaq eldimekeninde ornalasqan ýaqytsha ustaý ornyna jetkizilgen.

— Qańǵybas ıt, mysyqtardy aýlaý «102» jáne «109» biryńǵaı baılanys ortalyǵy arqyly jeke jáne zańdy tulǵalardyń ótinimderi boıynsha júzege asyrylady. Túrkistan qalasy boıynsha quramynda 2 ańshy, 2 júrgizýshisi bar 2 brıgada qaraýsyz qalǵan jáne qańǵybas janýarlardy aýlaýǵa shyǵady, — dep atap ótti basqarmadan.

Budan buryn Túrkistan oblysynda jaıylymdaǵy mal jyrtqyshtarǵa jem bolyp jatqanyn jazǵan edik.