37 jastaǵy SQO turǵyny úılený úshin ómirinde birinshi ret qujat aldy
PETROPAVL. QazAqparat – Soltústik Qazaqstan oblysynda er adam 37 jasynda alǵash ret qujat aldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Qyzyljar aýdanynyń 37 jastaǵy turǵyny birinshi ret jeke kýáligin aldy.
Ol aýdandyq polıtsııa bólimine shamamen 2 aı buryn júgingen. Er adamda buǵan deıin eshqandaı jeke qujaty, tipti týý týraly kýáligi de bolmaǵan.
Qyzyljar aýdany polıtsııa bólimi kóshi-qon qyzmetiniń qyzmetkerleri azamattyqty anyqtaý rásimin ótkizdi. Tynymsyz eńbektiń nátıjesinde qujattar qolǵa tapsyryldy.
Er adam QR azamaty bolyp tanylyp, medıtsınalyq jáne memlekettik qyzmetterdi paıdalanýǵa jáne resmı túrde jumysqa ornalasýǵa múmkindik aldy.
Aıta ketetini, dál sol kúni ol neke qııýǵa ótinish berdi.
«Qyzyljar aýdany polıtsııa bólimi kóshi-qon qyzmeti toby ınspektorlaryna túsinistikpen qarap, ózderiniń mindetterin minsiz atqarǵany jáne jedel kómek kórsetkenderi úshin alǵysym sheksiz. Qysqa merzim ishinde jeke kýálikti resimdeýge kómektesti», - depti aýyl turǵyny SQO polıtsııa departamenti bastyǵy Marat Tólebaevtyń atyna jazǵan hatynda.
«Oblystyq polıtsııa vedomstvosynyń kóshi-qon qyzmetiniń qyzmetkerleri QR qujattary joq azamattarynyń quqyqtyq mártebelerin retteý boıynsha jumysty jalǵastyrady. Jyl basynan oblystyń 66 turǵynynyń quqyqtyq mártebesi retteldi. Onyń 35-i eski úlgidegi tólqujatpen júrse, qalǵandarynda jeke bastaryn kýálandyratyn qujattary múlde bolmaǵan», - deıdi SQO PD kóshi-qon qyzmeti basqarmasynyń bastyǵy Talǵat Ábilov.
