37 ótkizý pýnkti jańǵyrtylyp, shekaradan ótý ýaqyty qysqarady
ASTANA. KAZINFORM – Avtomobıl ınfraqurylymyn damytý memlekettik saıasattyń basymdyqtarynyń biri bolyp qala beredi. 2026 jyly jol jumystarynyń barlyq túrlerimen shamamen 11 myń shaqyrym qamtyldy, onyń ishinde 3,4 myń shaqyrymda qurylys jumystary júrse, 5 myń shaqyrymǵa jýyq respýblıkalyq joldarǵa jáne 2,4 myń shaqyrym jergilikti mańyzy bar joldarǵa jóndeý júrgizildi. Bul týraly Úkimettiń baspasóz qyzmeti habarlady.
Solardyń ishinde iri jobalar – «Aqtóbe – Qyzylorda», «Beıneý – Sekseýil», «Saryaǵash stansasyn aınalyp ótý», «Jańaózen – Túrikmenstan shekarasy», «Ortalyq – Batys» jáne «Qaraǵandy – Jezqazǵan» trassalary.
«Beıneý – Sekseýil», «Ulǵaısyn – Sekseýil» jáne «Qyzylorda – Sekseýil» jobalary da erekshe mańyzǵa ıe, olardyń qurylysyna osy jyldyń tamyz aıynda Qazaqstan Respýblıkasynyń Prezıdenti bastaý berdi. Úsh magıstraldyń jalpy uzyndyǵy 1 574 shaqyrymdy quraıdy, qurylysty 2029 jylǵa deıin aıaqtaý kózdelgen.
Dál osy jobalar Qazaqstan aýmaǵy arqyly Qytaı – Eýropa baǵyty boıynsha júkterdi jetkizý merzimin is júzinde úshten birine qysqartýǵa, tranzıt ýaqytyn úsh táýlikke deıin azaıtýǵa múmkindik beredi, bul Memleket basshysynyń negizgi halyqaralyq kólik dálizderin damytý jónindegi tapsyrmalarymen tikeleı ushtasyp otyr.
Sonymen qatar qoldanystaǵy jol jelileriniń sapasy da artyp keledi. Jyl sońyna deıin normatıvtik jaǵdaıdaǵy respýblıkalyq mańyzy bar avtomobıl joldarynyń úlesi 95%-ǵa, jergilikti mańyzy bar joldardyń úlesi 92%-ǵa jetpek.
Aqyly avtomobıl joldary jelisin damytý jalǵasýda, olardyń uzyndyǵy 2026 jyldyń sońyna deıin 6,3 myń shaqyrymnan 6,7 myń shaqyrymǵa deıin ulǵaıady.
Avtomobıl ótkizý pýnktterin jańǵyrtýǵa úlken kóńil bólinýde. EAEO-nyń ishki shekarasyndaǵy qoldanystaǵy 39 pýnkttiń 37-sinde rekonstrýktsııa júrgizilýde, bul olardyń ótkizý qabiletin aıtarlyqtaı arttyryp, memlekettik shekaradan ótý ýaqytyn qysqartýǵa múmkindik beredi.
5 myń shaqyrym temirjol, 33 mln tonna tranzıt jáne 124 vokzaldy rekonstrýktsııalaý
Temirjol ınfraqurylymyn dáıekti damytý elimizdiń tranzıttik áleýetin nyǵaıtýdyń negizgi faktorlarynyń biri bolyp tabylady.
Sońǵy bes jylda 5 myń shaqyrymǵa jýyq temirjol joly salyndy jáne jańǵyrtyldy – bul shamamen aldyńǵy úsh onjyldyqtaǵydan eki esege kóp. Tranzıttik tasymal kólemi 33 mln tonnaǵa jetti, al salanyń kirisi 3 trln teńgeden asty.
«Dostyq – Moıynty» jáne «Almaty stansasynyń aınalma temirjol jelisi» jobalary aıaqtalǵannan keıin Darbaza – Maqtaaral, Moıynty – Qyzyljar, Aıagóz – Baqty jańa jelileriniń qurylysy, sondaı-aq qoldanystaǵy jelini jańǵyrtý jumystary jalǵasyp jatyr. Aldaǵy úsh jyl ishinde taǵy 2,2 myń shaqyrym temirjol jolyn salý jáne jańǵyrtý qarastyrylýda.
Lokomotıv jáne vagon parkin jańartýǵa erekshe kóńil bólinýde. Otandyq Alstom jáne Wabtec kásiporyndarymen yntymaqtastyqtyń arqasynda bıyl tamyz aıynda 200-shi jáne 700-shi mereıtoılyq lokomotıvter shyǵaryldy.
Zamanaýı qaýipsizdik júıeleri, beınebaqylaý, bıodárethanalar jáne qoljetimdi ınternetpen jabdyqtalǵan jolaýshylar vagondaryn jańartý jalǵasyp jatyr. 2026 jyly 191 jańa jolaýshylar vagonyn jetkizý josparlanýda.
Memleket basshysynyń tapsyrmasymen 124 temirjol vokzalyn rekonstrýktsııalaý boıynsha aýqymdy baǵdarlama júzege asyrylyp jatyr. Búginde 100 nysanda qurylys-montaj jumystary aıaqtaldy, bul jolaýshylarǵa qyzmet kórsetý sapasyn aıtarlyqtaı arttyrmaq.
Aıta ketelik Qazaqstan avıatsııalyq habtardy damytyp jatyr.
