37 mln teńge shyǵyn keltirgen —Aqtóbede Qnet uıymdastyrýshylarynyń biri sottaldy
№2 Aqtóbe qalalyq sotynda G.Jumaǵazınaǵa qatysty is qaralyp, úkim shyqty. Ol 2019-2022 jyldar aralyǵynda Qnet kompanııasynyń bólimshesin ashyp, adamdarǵa 37 mln teńge shyǵyn keltirgen. Sottalýshy jazasyn 5 jyldan keıin ǵana óteıdi, dep habarlaıdy Kazinform.
№2 Aqtóbe qalalyq sotynda «Qarjylyq (ınvestıtsııalyq) pıramıdany qurý jáne oǵan basshylyq etý», «Qylmystyq jolmen alynǵan aqshany jáne (nemese) ózge múlikti zańdastyrý» baptary boıynsha G.Jumaǵazınaǵa qatysty is qaraldy. Іs materıalyna súıensek, ol 2019-2022 jyldar aralyǵynda Qnet kompanııasy men onyń ónimderin jarnamalap, 25 adamǵa 37 mln teńgeden astam shyǵyn keltirgen. Sýdıa Dınara Gılmanova búgin Qylmystyq kodekstiń eki baby boıynsha úkim oqydy.
«G.Jumaǵazına Qylmystyq kodekstiń 217-baby 3-bóligi 2-tarmaǵy boıynsha 5 jylǵa bas bostandyǵynan aıyrylyp, múlki tárkilensin. Kommertsııalyq jáne qarjylyq uıymdarda basshylyq etý quqyǵynan 7 jylǵa aıyrylsyn. Qylmystyq kodekstiń 2018-baby 2-bóligi, 1-tarmaǵy boıynsha 2 jylǵa bas bostandyǵynan aıyrylyp, múlki tárkilensin. Túpkilikti 5 jyl bas bostandyǵynan, 7 jylǵa kommertsııalyq jáne qarjylyq uıymdarǵa basshylyq etý quqyǵynan aıyrý jazasy taǵaıyndalsyn. G.Jumaǵazınanyń jazasyn óteý orny qaýipsizdigi barynsha tómen túzetý mekemesi dep belgilensin»,- dedi sýdıa Dınara Gılmanova.
Sot úkimin oqý kezinde sottalýshynyń kámelet jasqa tolmaǵan balasy bar ekeni eskerilip, jazasyn óteý ýaqyty 5 jylǵa keıinge shegerildi. Al sol aralyqta G.Jumaǵazına probatsııalyq baqylaýda bolady. Eger eki ret ákimshilik jaza qoldanylsa, birden túzetý mekemesine qamalady.
Sonymen birge sottalýshy jábirlenýshilerdiń shyǵynyn tolyq keri qaıtarǵan.
- Qylmystyq is kezinde tapqan jyljymaly jáne jyljymaıtyn múlki memleket paıdasyna tárkilensin. Olar: 2021 jylǵy Mercedes-Benz kóligi, Almaty qalasyndaǵy kólik turaǵy, Almaty qalasyndaǵy jyljymaıtyn múlki, Aqtóbe qalasyndaǵy páterin satqandaǵy 30 mıllıon teńge aqshasy,- dedi Dınara Gılmanova.
Sot úkimi kúshine engen joq.
