37 qazaqstandyq eksporttaýshy «Báıterek» holdınginen qoldaý aldy
NUR-SULTAN. QazAqparat – Jyl basynan beri 37 qazaqstandyq eksporttaýshy «Báıterek» holdınginen qoldaý aldy, dep habarlaıdy QazAqparat.
«Báıterek» UBH» AQ-nyń enshiles uıymy «KazakhExport» eksporttyq saqtandyrý kompanııasy» AQ aǵymdaǵy jyldyń basynan 37 qazaqstandyq eksporttaýshyny qoldady, onyń 10-y TJ rejıminiń áreket etý kezeńinde 1 mlrd teńgeden astam somaǵa saqtandyrý qoldaýyna ıe boldy, 6-y kompanııa quraldaryn alǵash ret paıdalanǵandar.
Qashyqtyqtan jumys isteýdi uıymdastyrýǵa kóshkennen bastap KazakhExport barlyq bıznes-protsesterdi saqtaı otyryp, klıenttermen ózara is-qımyldyń jedeldigin de arttyra tústi, sebebi kóptegen máselelerdi sheshý onlaın alańǵa ótti.
2020 jyldyń birinshi toqsanynyń qorytyndysy boıynsha KazakhExport qabyldaǵan mindettemelerdiń kólemi shamamen 19 mlrd teńgeni qurady, bul 2019 jyldyń uqsas kezeńinen úsh ese kóp, eksport aldy qarjylandyrý jáne saýdany qarjylandyrý boıynsha shartty salymdardyń somasy 10,9 mlrd teńgege jetti, qoldaý kórsetilgen kelisimsharttardyń somasy 50,7 mlrd teńgeden asty.
Sonymen qatar, Qazaqstannyń ár túrli salalary men óńirlerindegi 22 eksporttaýshy boıynsha 29 mlrd teńge somasyndaǵy jobalar maquldandy jáne saqtandyrý sharttaryn jasaýdyń satysynda tur.
Bıylǵy jyldyń basynan beri KazakhExport qoldaǵan tabysty keıster týraly osy kompanııa basshysy Rýslan Ysqaqov aıtyp ótti. Máselen, onyń aıtýynsha, kábil-ótkizgish ónimder óndirý boıynsha iri otandyq «Qazenergokabel» AQ ımportty almastyrý boıynsha úkimettik baǵdarlamaǵa belsene qatysyp qana qoımaı, syrtqy naryqtardy da ıgerýde.
- Biz zaýytpen Ózbekstan men Reseıge qazaqstandyq ónimderdi jetkizýge arnalǵan úsh eksporttyq kelisimshart boıynsha saqtandyrý sharttaryn jasadyq. KazakhExport-tyń saqtandyrý qoldaýynyń arqasynda otandyq eksporttaýshy, tólemin keıinge qaldyra otyryp, sheteldik kontragentterge óz ónimderin táýekelsiz jibere alady, bul rette jiberý kólemin edáýir ulǵaıta alady. Saqtandyrylǵan eksporttyq kelisimsharttardyń somasy 21,5 mln dollardy qurady, - dep túsindirdi Rýslan Ysqaqov.
Saqtandyrylǵan eksporttyq kelisimsharttar sheńberinde kásiporyn aınalymdaǵy qarajatty tolyqtyrý úshin ekinshi deńgeıdegi bankte kredıt jelisin ashty. KazakhExport osy jeli boıynsha qorlandyrý usyndy, sonyń arqasynda Qazenergokabel qaryzdy tómen syıaqyny stavkalarymen rásimdeý múmkindigine ıe boldy. Eksportqa deıingi usynylǵan qarjylandyrýdyń jalpy kólemi 340 mln teńgeden asty.
Bıylǵy jyly birinshi ret KazakhExport-tyń qoldaý quraldaryn qubyrlar men fıtıngterdi óndirýge jáne satýǵa mamandandyrylǵan «Fidelis Global» JShS jáne plastıkti ekstrýzııalaý jáne quımaly presteý jónindegi iri kompanııa «Novus Polymer» JShS sııaqty kásiporyndar paıdalandy, olardy qarjylandyratyn bank úshin «Qaryzdardy saqtandyrý»quraly sheńberinde saqtandyrý ótemi berildi.
- KazakhExport-tyń osy qarjylyu-saqtandyrý quralynyń kómegimen kompanııalar aınalym qarajatyn tolyqtyrýǵa 400 mln teńge kóleminde qarjy aldy, bul óz kezeginde Ózbekstan men Tájikstanǵa qosymsha shıkizat satyp alýǵa jáne eksporttalatyn ónim kólemin ulǵaıtýǵa múmkindik berdi, - dep habarlady Rýslan Ysqaqov.
2020 jyldyń basynan beri qoldaý tapqan jobalardyń ishinde azyq-túlik ónimderin óndirýshiler de bar. KazakhExport-tyń quraldaryn alǵashqy bolyp 122 kompanııadan turatyn jáne ártúrli elderde 76 ókildigi bar, «CG Corp Global» JShS iri halyqaralyq korporatsııasyna kiretin «CG FOOD Central Asia» JShS-y paıdalandy. Ótken jyldyń jeltoqsan aıynda korporatsııa óziniń óndiristik jelisin keńeıtý aıasynda Túrkistan oblysynda tez daıyndalatyn kespe zaýytyn ashty.
«CG FOOD Central Asia» JShS Reseı Federatsııasyndaǵy úsh sheteldik satyp alýshyǵa qatysty eksporttyq kredıtter boıynsha sharttardy saqtandyrýǵa ıe boldy. Endi eksporttaýshy óz ónimin shetel kontragentterine tólemdi keıinge qaldyra otyryp, táýekelsiz jibere alady, bul rette jiberý kólemin edáýir ulǵaıta alady. Saqtandyrylǵan eksporttyq kelisimsharttardyń somasy 130 mln reseı rýblin qurady.
Zaýyt 2020 jyldyń basynda qazaqstandyq tez daıyndalatyn kespeni jetkizýdi bastady jáne RF men Ózbekstanǵa eksporttaý geografııasyn birtindep keńeıtýdi josparlap otyr.
- Qazirgi ýaqyttaǵy jaǵdaı - otandyq bıznes pen jalpy el úshin úlken synaq. «Báıterek» holdıngi men «KazakhExport» enshiles uıymynyń basty mindeti - ekonomıkanyń basym sektorlaryndaǵy shıkizattyq emes taýarlar, jumystar, qyzmetter eksportynyń ósýin qoldaý jáne qazaqstandyq kásiporyndardy qarjylyq-saqtandyrý jáne qarjylyq emes qoldaý tájirıbesin qalyptastyrý. Biz belsendi jumys atqarýdamyz, bizdiń aımaqtyq menedjerlerimiz árdaıym óndirýshilermen, jergilikti basqarý organdarymen baılanysta bolyp, klıentterge KazakhExport quraldary boıynsha der kezinde sheshimder usynýda, - dep túıindedi Rýslan Ysqaqov.
2017 jyldan bastap KazakhExport quraldaryn Qazaqstannyń túrli óńirlerinen mashına jasaý, metallýrgııa, hımııa, tamaq jáne jeńil ónerkásip, agroónerkásiptik keshen salalaryndaǵy qyzmetti júzege asyratyn 112 otandyq eksporttaýshy kásiporyn paıdalandy. Osy úsh jyldyń ishinde saqtandyrý qoldaýynyń jalpy kólemi 245,9 mlrd teńgeni qurady,onyń 97 mlrd teńgesi ótken jylǵa tıesili. Oblystar boıynsha qoldaý kórsetilgen kelisimsharttardyń eń kóp somasy Almatyǵa (71 mlrd.teńge), Qostanaı (48,3 mlrd. teńge), Pavlodar (29 mlrd. teńge) jáne Aqtóbe oblystaryna (17,6 mlrd. teńge) tıesili.
