367 materıalǵa dintaný saraptamasynyń teris qorytyndysy berildi - mınıstrlik
ASTANA. KAZINFORM – Bıyl 367 materıalǵa dintaný saraptamasynyń teris qorytyndysy berildi. Bul týraly Mádenıet jáne aqparat mınıstrliginiń Din isteri komıtetinen málim etti.
- Bıyl jyl basynan 1 896 materıalǵa dintaný saraptamasy júrgizildi. Onyń ishinde 367 nysanǵa dintaný saraptamasynyń teris qorytyndysy berildi, - dep atap ótti komıtetten agenttiktiń resmı saýalyna oraı.
Komıtettiń atap ótýinshe, dintaný saraptamasy Mədenıet jəne sport mınıstriniń 2014 jylǵy 30 jeltoqsandaǵy №162 buıryǵymen bekitilgen Dintaný saraptamasyn júrgizý qaǵıdalaryna səıkes júrgiziledi. Saraptama dnı materıaldardyń mazmuny men zańnamaǵa sáıkestigin baǵalaıdy.
Dintaný saraptamasy zertteletin materıaldyń belgili bir dinı ilimge qatystylyǵyn anyqtaýǵa jáne onyń mazmunyn beıtaraptyq qaǵıdaty turǵysynan zerdeleýge baǵyttalǵan. Saraptama barysynda dinı kózqarastar men ǵıbadat etý tájirıbesiniń olardy ustanýshylarǵa jáne qoǵamnyń basqa múshelerine yqtımal teris áseri de baǵalanady.
Sonymen qatar sarapshylar saraptama júrgizýge ótinish bergen uıym qoıǵan máselelerdi eskere otyryp, zertteý nysandaryn qarastyrady. Dinı birlestikterdiń quryltaı qujattaryn zerdeleý kezinde olardyń qyzmetiniń naqty nysandary men ádisterine de nazar aýdarylady.
Budan bólek, saraptama obektileri Qazaqstan Respýblıkasynyń Konstıtýtsııasy men qoldanystaǵy zańnamasyna qaıshy keletin normalardyń bar-joǵy turǵysynan zertteledi. Sondaı-aq Qazaqstan azamattarynyń quqyqtary men bostandyqtarynyń buzylýyna jol berilmeýi máselesine baǵa beriledi.
- Bul rette dinı materıaldyń mazmuny jekelegen sózder boıynsha emes, keshendi túrde qarastyrylady, - dedi komıtetten.
Aıta keteıik, «Jýsan» arnaıy gýmanıtarlyq operatsııasy aıasynda oralǵan azamattardyń basym bóligi radıkaldy kózqarastarynan bas tartyp, qoǵamǵa beıimdelip jatyr.
