366 myńnan astam elorda turǵyny vaktsınanyń 1-i komponentin aldy
«Búginde 366 myńnan astam adam vaktsınanyń 1 komponentin aldy jáne 284 myńnan astam azamat tolyq ımmýndaýdan ótti. Halyqtyń vaktsına alýyn qamtý maqsatynda medıtsına uıymdarda, saýda ortalyqtarynda ekpe egý beketteriniń jumys kestesi jeksenbi men mereke kúnderin qosa alǵanda saǵat 10:00-den 22:00-ge deıin uzartyldy. Sondaı-aq, elordada 8 saýda oıyn-saýyq ortalyǵynda (Han-Shatyr, MegaSilkWay, Kerýen, Abý-Dabı Plaza, Azııa Park, Saryarqa, Evrazııa, Mechta dúkeni) vaktsına alý beketteri jumys istep tur», - dedi Nur-Sultan qalasy Qoǵamdyq densaýlyq saqtaý basqarmasynyń basshysy Tımýr Muratov OKQ-de onlaın ótken baspasóz máslıhatynda.
Onyń málimdeýinshe, búginde saýda jáne oıyn-saýyq ortalyqtarynda barlyǵy 60 myńǵa jýyq adam vaktsına aldy.
«Sońǵy ýaqytta halyqtyń vaktsına alý belsendiligi baıqalyp otyr. Adamdar óz densaýlyǵymen qatar aınalasyndaǵylardyń da saýlyǵy týraly sanaly túrde oılana bastady», - deıdi ol.
Buǵan deıin T. Muratov jansaqtaý bóliminde jatqan naýqastardyń deni vaktsına almaǵanyn málim etti.
Sondaı-aq, búginde elordada koronavırýspen kúresip jatqan 7 balanyń jaǵdaıy aýyr.
Odan bólek, Nur-Sultan qalasynda bir táýliktiń ishinde jádel járdem qyzmetine 3300-den astam qońyraý túsip, mobıldi brıgadalar kúnine 2 myńnan astam shaqyrtýǵa barǵany aıtyldy.
