366 qazaqstandyq Majarstannyń JOO-larynda bilim alýǵa joldama aldy

ASTANA. KAZINFORM — Majarstan úkimeti 366 qazaqstandyqqa bilim grantyn usyndy, dep habarlaıdy «Halyqaralyq baǵdarlamalar ortalyǵy» AQ baspasóz qyzmeti.

Qorytyndy komıssııanyń sheshimimen 366 qazaqstandyq Majarstannyń jetekshi joǵary oqý oryndarynda bakalavrıat, magıstratýra jáne doktorantýra baǵdarlamalary boıynsha bilim alýǵa usynyldy. «Stipendium Hungaricum» stıpendııalyq baǵdarlamasy boıynsha konkýrstyq irikteýge 1607 úmitker qatysty.

— Úkimetaralyq kelisim aıasynda qazaqstandyqtarǵa jyl saıyn «Stipendium Hungaricum» baǵdarlamasy boıynsha Majarstannyń jetekshi joǵary oqý oryndarynda akademııalyq bilim alýǵa bilim berý granttary usynylady. Grant oqý aqysyn, jataqhanada turý shyǵyndaryn, medıtsınalyq saqtandyrýdy qamtıdy, sondaı-aq aı saıynǵy stıpendııa tólenedi, — delingen habarlamada.

Esterińizge sala keteıik, «Stipendium Hungaricum» bilim berý granttaryn taǵaıyndaý jónindegi sońǵy sheshim Majarstan tarapynan qabyldanady.

Usynylǵan qazaqstandyqtardyń tizimi «Halyqaralyq baǵdarlamalar ortalyǵy» AQ-nyń resmı saıtynda jarııalandy.

Osyǵan deıin «Bolashaq» baǵdarlamasy aıasynda atom energetıkasy mamandary bilim alatynyn jazǵan edik.