360 metrlik alyp: Germanııada álemdegi eń bıik jel týrbınasy salynyp jatyr
ASTANA. KAZINFORM – Germanııadaǵy shaǵyn qalashyqtardyń birinde álemdegi eń bıik jel týrbınasy kókke boı kóterip keledi. Bıiktigi 360 metr bolatyn bul nysan jańa tehnologııalardyń Eýropadaǵy jel energetıkasyn qalaı tıimdi ete alatynyn kórsetýge arnalǵan. Bul týraly Euronews jazdy.
Germanııanyń Brandenbýrg jerindegi shaǵyn Schipkau qalashyǵynda naýryz aıynda erekshe qurylys alańyndaǵy jumystar qaıta jandandy. Qurylys josparǵa saı aıaqtalsa, munda álemdegi eń bıik jel týrbınasy salynady, dep habarlaıdy GICON qurylys kompanııasy. Іrgetas plıtasynan bastap rotor ushyna deıingi bıiktigi shamamen 360 metr bolady.
Bul kórsetkish týrbınany Germanııadaǵy bıiktigi 368 metrlik Berlin TV Tower nysanynan keıingi ekinshi eń bıik qurylysqa aınaldyrady. GICON kompanııasynyń málimdeýinshe, bul bıik jel týrbınasy energııamen qamtý júıesiniń táýelsizdigin arttyrýǵa yqpal etedi.
Drezdendegi ınjenerlik qyzmet kórsetýshi GICON usynǵan kórsetkishterge kóz júgirtsek: hab bıiktigi – 300 metr, jyldyq boljamdy elektr energııasyn óndirý kólemi – 30–33 gıgavatt-saǵat, al elektr energııasyn óndirý quny – kılovatt-saǵatyna 5 tsentten tómen.
Kompanııa dereginshe, bul kólem tórt adamnan turatyn shamamen 7500 úı sharýashylyǵyn elektr qýatymen qamtamasyz etýge jetedi. 3 naýryzdaǵy baspasóz habarlamasynda GICON Schipkau Wind Farm jel parkiniń mańyndaǵy kádimgi týrbınalarmen salystyrǵanda elektr óndirý kólemi 220 paıyzǵa deıin artatynyn málimdedi.
Munyń fızıkalyq negizi túsinikti: jel týrbınasy neǵurlym bıik ornatylsa, soǵurlym kúshtirek ári turaqty jel aǵynyn ustaıdy.
2010 jyldan beri osy tehnologııamen aınalysyp kele jatqan GICON bul boljamdy ǵylymı turǵyda dáleldeýdi maqsat etken. beventum GmbH kompanııasynyń, ıaǵnı SPRIND agenttiginiń enshiles kásipornynyń tapsyrysy boıynsha kompanııa kórshiles Klettwitz eldi mekeninde jeldi ólsheıtin dińgek ornatqan.
Zertteý nátıjesi 300 metr bıiktikte jeldiń ádettegi deńgeılerge qaraǵanda rasynda da turaqty ári kúshti soǵatynyn kórsetti.
Mundaǵy negizgi tehnıkalyq másele – týrbınany osyndaı bıiktikke qalaı kóterý bolyp otyr. Bul jerde kádimgi krandardyń shamasy jetpeıtindikten, kompanııa patenttelgen teleskopııalyq qurylǵyny qoldanýdy josparlap otyr. ıAǵgı jobalyq qujattarǵa sáıkes, týrbına aldymen 150 metr bıiktikte ornatylyp, keıin 300 metrge deıin joǵary kóteriledi.
Al rorly dińgek jergilikti óndiristegi bolattan jasalǵan.
Eske sala keteıik, Frantsýz kompanııasy Jambyl oblysynda alyp jel elektr stantsııasyn salýdy bastady.
