36 járdemaqynyń 14 túrine muqtajdyq krıterııi engiziledi – Eńbek mınıstrligi
ASTANA. KAZINFORM – Respýblıkalyq bıýdjet qarjylandyratyn 36 járdemaqynyń 14 túrine ǵana muqtajdyq krıterııi engiziledi. Alaıda múgedektigi bar balalarǵa, I jáne II toptaǵy múgedektigi bar adamdarǵa jáne basqa da jekelegen sanattarǵa arnalǵan áleýmettik kepildikter saqtalady. Bul týraly Eńbek jáne halyqty áleýmettik qorǵaý mınıstri Asqarbek Ertaev aıtyp berdi.
Olardyń qatarynda balaly otbasylarǵa beriletin jekelegen tólemder, múgedektikke, kútimge, asyraýshysynan aıyrylýǵa baılanysty járdemaqylar, jerleýge beriletin tólemder jáne arnaýly memlekettik járdemaqylar bar.
S, D jáne E sanatyndaǵy otbasylar atalǵan tólemderdi alý quqyǵyn saqtaıdy.
A jáne V sanatyndaǵy otbasylar úshin bul tólemderdi alý múmkindigi shekteledi. Qalǵan 22 túrli járdemaqy burynǵy tártippen taǵaıyndalady.
– Qujattardaǵy aıyrmashylyqqa qatysty máselege toqtalyp ketýge ruqsat etińizder. Úkimettiń 5 qazandaǵy №870 qaýlysynda 10 járdemaqy kórsetilgen. Al muqtajdyq qaǵıdaty boıynsha 14 tólem qaralyp jatyr. Munda eshqandaı qaıshylyq joq. Aıyrmashylyq tólemderdi toptastyrý tártibine baılanysty bolyp otyr, – dep túsindirdi mınıstr.
Arnaýly memlekettik járdemaqynyń bes túri bir tarmaqqa biriktirilgen. Jerleýge beriletin tólem jeke kórsetilgen.
Al arnaýly kásiptik járdemaqy muqtajdyq deńgeıin baǵalaý qoldanylmaıtyn tólemder tizbesine engizilgen. Іs júzinde muqtajdyqty baǵalaý 14 tólemge qoldanylady.
Sonymen birge, otbasynyń ál-aýqat deńgeıine qaramastan, jekelegen áleýmettik kepildikter saqtalady.
– Olardyń qatarynda múgedektigi bar balalarǵa, I jáne II toptaǵy múgedektigi bar adamdarǵa, jetimderge, sondaı-aq jasyna baılanysty zeınetaqy alatyn, kópbalaly analarǵa arnalǵan nagradalarmen marapattalǵan analarǵa beriletin járdemaqylar bar. Otbasy A nemese V sanatyna jatsa da, bul tólemder saqtalady, – dedi Asqarbek Ertaev.
Mınıstrdiń sózinshe, memleket ózine alǵan áleýmettik mindettemelerin esh jaǵdaıda toqtatpaıdy.
Buǵan deıin Eńbek mınıstri «A» sanatynyń belgilerin ataǵan edi.
Al járdemaqy úshin ajyrasýdyń aldyn alý úshin bólek turatyn ata-analar da balanyń otbasy quramyna engiziledi.
