36 mlrd teńgeni jymqyrǵan shymkenttik «naýqas» kásipkerler sottaldy
ShYMKENT. QazAqparat - Shymkentte jalǵan kásipkerlikpen aınalysqan qylmystyq toptyń músheleri sottaldy. Uıymdasqan topqa salyqtan jaltaryp, 36 mlrd teńgeni jymqyrdy degen aıyptar taǵyldy, dep habarlaıdy QazAqparat tilshisi.
Sot otyrysynda belgili bolǵandaı, jeti adamnan quralǵan toptyń músheleri 2010 jyldan beri 16 jaýapkershiligi shekteýli seriktestik ashqan. Jalǵan kásipkerlikpen aınalysqandar jeńil aqshamen qaltalaryn qalyńdatyp júrgeni anyqtaldy. Tipti seriktestikterdi múmkindigi shekteýli nemese aýyr naýqas adamdardyń atyna ashyp, salyqtan jaltarýdyń jolyn tapqan. Qarjylyq quıtyrqylardy oblystyq Memlekettik kirister departamenti ekonomıkalyq tergeý basqarmasynyń qyzmetkerleri áshkereledi. Olarǵa qatysty 44 qylmystyq is qozǵalǵan.
Ál-Farabı aýdandyq soty aıyptalýshylardy Qylmystyq kodekstiń 262, 245, 218, 238 jáne 240-baptary boıynsha kináli dep tanyp, úkim shyǵardy. Aıyptalýshylardyń aldy alty jarym jyldan on jylǵa deıin bas bostandyqtan aıyrý jazasyna kesildi. Al qylmystyq toptyń jetekshisi 10 jylǵa túrmege jabyldy.
