36 mln-ǵa jýyq teńge: BQO-daǵy 19 kásiporynnyń bereshegi óteldi
ORAL. KAZINFORM – BQO boıynsha eńbek ınspektsııasy departamentine bıylǵy úsh aıda eńbek zańnamasynyń talaptaryn buzý jáne túsindirý máseleleri boıynsha 676 ótinish kelip tústi.
Departament basshysy Asylulan Dosjanovtyń málim etkenindeı, bul ótken jyldyń osy kezeńimen (438) salystyrǵanda, 35 paıyzǵa artyq.
Asylulan Tursynulynyń sózine qaraǵanda, ótinishter sanynyń artýynyń negizgi sebepteri retinde eńbek ınspektsııasynyń túsindirý jumystarynyń jandanýyn, onyń ishinde buqaralyq aqparat quraldary men áleýmettik jeliler arqyly júrgizilgen jumystardy atap ótýge bolady. Sonyń nátıjesinde azamattar ózderiniń eńbek quqyqtarynyń buzylý faktilerin jaqsyraq túsine bastady.
– Ótinishter jalaqynyń jáne ózge de tólemderdiń ýaqytyly ári tolyq tólenbeýi, jumystan bosatý, tártiptik jazalardy qoldaný, jyl saıynǵy aqyly eńbek demalysyn berý máselelerine qatysty boldy. Aryz-shaǵym kóbeıgendikten, tekserý is-sharalarynyń sany da kóbeıdi. Bıyl azamattardyń ótinishteri, sondaı-aq quqyq qorǵaý jáne memlekettik organdardyń talaptary negizinde eńbek ınspektorlarymen 57 kásiporyn men uıym tekserildi, bul 2025 jyldyń osy kezeńimen (48) salystyrǵanda 15 paıyzǵa joǵary, - dedi A.Dosjanov.
Onyń aıtýynsha, tekseris barysynda 79 quqyq buzýshylyq (2025 jyly osy ýaqytta – 53) anyqtalsa, sonyń 71-i (49) eńbek qatynastary, 8-i (4) eńbek qaýipsizdigi jáne eńbekti qorǵaý salasyna qatysty boldy.
– Anyqtalǵan buzýshylyqtar boıynsha 52 (2025 jyly úsh aıda – 37) nusqama berilip, 3,806 mln teńgege 19 aıyppul salyndy. Ótken jyly osy merzimde 5,249 mln teńgege 22 aıyppul salynǵan edi. Jyl basynan beri sonymen qatar 19 kásiporynda 35,779 mln teńge kólemindegi jalaqy bereshegi ótelip, 25 jumyskerdiń quqyqtary qorǵaldy. Bul óz kezeginde eńbek daýlary men janjaldardyń aldyn alýǵa yqpal etti, - dep qosty departament basshysy.
Eske sala keteıik, budan buryn BQO-da eńbek ınspektorlarynyń tekserisinen keıin 235 zańbuzýshylyq anyqtalǵanyn jazǵan bolatynbyz.
Sondaı-aq BQO-da jazataıym oqıǵalar saldarynan 11 adam zardap shekti.
