36 myńnan astam astanalyq jańa jumys kestesine kóshti

ASTANA. KAZINFORM – Astanada 36-38 myńǵa jýyq adam jańa jumys kestesine kóshti, dep habarlady elorda ákimi Jeńis Qasymbek Nura aýdanynyń turǵyndarymen kezdesýde.

— Búgingi tańda biz 36-38 myńǵa jýyq adamnyń, negizinen memlekettik, ulttyq, kommýnaldyq kompanııalardyń, sondaı-aq memlekettik organdardyń qyzmetkerleri aýysqanyn kórip otyrmyz, — dedi ákim.

Jeńis Qasymbektiń aıtýynsha, jańa jumys kestesine kóshý qorytyndysy qarasha aıynyń sońyna qaraı baıqalatyn bolady.

— Biz bul ózgeristiń oń áseri bolatynyna senimdimiz, — dep sendirdi ol.

Sondaı-aq, qala basshysy kesteniń ózgerýimen qatar elordada kólik keptelisine qarsy sharalar retinde qoǵamdyq kólikti damytý jalǵasyp jatqanyn atap ótti.

— Osy aptada men barlyq jeti avtobýs parkin araladym. 2,5 jyl ishinde 800-900 avtobýs aýystyryldy, bul búkil qalalyq parktiń 40%-yn alady. Kelesi jyly taǵy 400 avtobýsty jańartýdy josparlap otyrmyz. Adamdardy qoǵamdyq kólikti paıdalanýǵa barynsha tartamyz, - dedi Jeńis Qasymbek.

Ol avtobýstardyń jyldamdyǵy ótken jylmen salystyrǵanda bıyl 3,5 km-ge óskenin habarlady.

— Ótken jyly orta eseppen táýligine 800 myń adam avtobýstardy paıdalanǵan. Búgingi tańda — 1 mln 150 myń, ıaǵnı, ósim 300-350 myń jolaýshyny qurady, — dedi qala ákimi.

Budan bólek, ákimniń málimdeýinshe, Astanada Aıtmatov jáne Táýelsizdik kósheleriniń jalǵasy qala mańyna deıin jalǵasady. Bul joldar Máńgilik el dańǵylyn kólik keptelisinen saqtaýǵa kómektesedi. 

Aıta keteıik, buǵan deıin Almatydaǵy kepteliske memlekettik qyzmetkerlerdiń jumys ýaqytynyń ózgerýi qalaı áser etkenin jazǵan edik.