3,6 mıllıon qaralym: qazaqstandyqtar elektrondy kitaptardy jıi oqı bastady
ASTANA. KAZINFORM - 16 mamyrda Memleket basshysy «Kitap oqý mádenıetin damytý jáne zerdeli ult qalyptastyrý jónindegi sharalar týraly» Jarlyqqa qol qoıdy. Qujat adamı kapıtaldy damytýǵa, qoǵamnyń zııatkerlik áleýetin nyǵaıtýǵa jáne azamattardyń kitap oqýǵa degen qyzyǵýshylyǵyn arttyrýǵa baǵyttalǵan.
QR Mádenıet jáne aqparat mınıstrligi baspasóz qyzmetiniń habarlaýynsha, Prezıdent tapsyrmalaryn oryndaý aıasynda mınıstrlik kitaphana salasyn jańǵyrtý, kitap oqýdy keńinen nasıhattaý jáne halyqtyń bilim men aqparatqa qoljetimdiligin arttyrý baǵytynda keshendi sharalardy júzege asyryp keledi. Bul rette salany tsıfrlandyrýǵa erekshe mán berilip otyr.
Búginde ulttyq jazba muramyzǵa keńinen qol jetkizýdiń negizgi quraldarynyń biri – ulttyq elektrondy kitaphana, ıaǵnı QazUEK. Portalda kitaptar, sırek qujattar men qoljazbalar, merzimdi basylymdar, dıssertatsııalar, arhıv materıaldary, aýdıo jáne beınejazbalar, kartalar jáne basqa da tsıfrlyq resýrstar jınaqtalǵan.
2026 jyldyń basynan beri QazUEK materıaldaryn qaraý sany 3,6 mıllıonnan asty. Qashyqtan paıdalanýshylar sany 295 116 adamǵa jetse, elektrondy kóshirmelerdi júkteý kórsetkishi 891 551-di qurady.
Osy kezeńde elektrondy kitaphana qoryna 2 506 tsıfrlyq kóshirme engizilip, 437 qujat óńdeýden ótkizildi jáne 127 555 bet skanerlendi. Qazirgi tańda QazUEK-tiń jalpy qorynda 86 315 qujat bar. Onyń ishinde tsıfrlandyrylǵan 10 myńnan astam qoljazba men sırek kitap saqtalǵan.
Elektrondy kitaphana qyzmetin álemniń 122-den astam eliniń oqyrmandary paıdalanady. Portalǵa Qazaqstan, Qytaı, Reseı, AQSh, Vetnam, Ózbekstan, Túrkııa, Germanııa, Frantsııa jáne Qyrǵyzstan turǵyndary erekshe qyzyǵýshylyq tanytyp otyr. Elektrondy qujattar álemniń 70 tilinde usynylǵan.
Portaldaǵy barlyq materıaldy tirkelýsiz-aq erkin qaraýǵa bolady. QazUEK qorynda «Memlekettik baǵdarlamalar aıasynda jaryq kórgen kitaptar», «Sırek qujattar men qoljazbalar», «Túrkitildes elder kitaphanasy» jáne basqa da taqyryptyq jınaqtar bar.
Aldaǵy ýaqytta bul jumys Ulttyq tsıfrlyq kitaphana platformasyn qurý arqyly jańa deńgeıge kóterilmek. Biryńǵaı platforma elektrondy katalogtardy, tsıfrlyq qorlardy, bilim berý resýrstary men zamanaýı servısterdi ózara biriktiredi. Sonyń nátıjesinde azamattar turǵylyqty jerine qaramastan otandyq ádebıetke, ǵylymı basylymdarǵa, sırek kitaptar men arhıv materıaldaryna erkin qol jetkize alady.
Osyǵan deıin balalar men jastar arasynda kitap oqý mádenıetin damytýǵa basymdyq beriletini týraly jazdyq.
