36 qazaqstandyq kásiporyn Eýropaǵa organıkalyq ónim eksporttap otyr — mınıstr
ASTANA. KAZINFORM — Aýyl sharýashylyǵy mınıstri Aıdarbek Saparov Qazaqstandaǵy Italııa Respýblıkasynyń Tótenshe jáne ókiletti elshisi Antonello De Rıýmen kezdesý ótkizdi. Taraptar agroónerkásiptik keshen salasyndaǵy saýda-ekonomıkalyq jáne ınvestıtsııalyq yntymaqtastyqty keńeıtý máselelerin talqylady.
Aıdarbek Saparov aýyl sharýashylyǵy salasy qazaqstan-ıtalıan áriptestiginiń basym baǵyttarynyń biri ekenin atap ótti.
— Aýyl sharýashylyǵy ónimderi saýdasynyń turaqty ósimi elderimiz ekonomıkasynyń joǵary áleýetin kórsetedi. Biz eksport kólemin arttyrýǵa, ınvestıtsııa tartýǵa jáne AÓK salasynda tehnologııalar almasýǵa múddelimiz. Qazirgi tańda bizde organıkalyq aýyl sharýashylyǵy sektory belsendi damyp keledi. Arnaıy zań qabyldandy, búginde 36 qazaqstandyq kásiporyn Eýropaǵa organıkalyq ónim eksporttap otyr. Osy baǵytta yntymaqtastyq ornatýǵa daıynbyz, — dedi mınıstr.
2025 jylǵy qańtar–sáýir aralyǵynda Qazaqstan men Italııa arasyndaǵy aýyl sharýashylyǵy ónimderiniń taýar aınalymy 105,9 mln AQSh dollar bolyp, 59%-ǵa ósti. Qazaqstandyq eksporttyń negizgi pozıtsııalary boıynsha aıtarlyqtaı ósim baıqalady: bıdaı — 47%-ǵa, burshaq daqyldary — 103 ese, kúnjara — 100%.
Eksporttalatyn ónimderdiń EO standarttaryna sáıkestigi máselesine erekshe nazar aýdaryldy.
Aıdarbek Saparov búginde 20 otandyq kásiporyn Eýropalyq odaqqa, sonyń ishinde Italııaǵa, balyq ónimderin eksporttaýǵa ruqsat alǵanyn atap ótti. Sondaı-aq 2025 jylǵy naýryzda Qazaqstan Eýropalyq odaqqa bal eksporttaýǵa resmı ruqsat aldy. Akvamádenıet jáne jylqy etin jetkizý boıynsha Eýropalyq komıssııamen kelissózder júrgizilip jatyr.
Antonello De Rıý Italııa bıznesiniń Qazaqstanǵa joǵary qyzyǵýshylyǵyn rastap, ınvestıtsııalyq áriptestikti damytýǵa qoldaý kórsetýge daıyn ekenin bildirdi.
— Italııa Úkimeti Qazaqstanmen yntymaqtastyqqa úlken mán beredi. Saıası dıalogpen qatar ekonomıkalyq baılanys ta damyp keledi, bul rette agroónerkásiptik sektor mańyzdy oryn alady, — dedi elshi.
Kezdesýde bolashaǵy zor birqatar joba qaraldy, atap aıtqanda: ıtalııalyq Tramite Group kompanııasynyń qyzanaq óńdeý zaýyty, jońyshqany túıirshikteý zaýyty, 20 myń tonna saqtaýǵa arnalǵan keptirý jáne muzdatý jemis kombınaty men qýattylyǵy 10 myń tonna bolatyn tońazytqysh keshen salý jobalary.
Aıta ketelik Qazaqstan Iranǵa bıdaı eksportyn jylyna 2 mln tonnaǵa deıin arttyrýdy josparlap otyr.