36 gradýs ystyq: Qostanaıda qutqarýshylar óńirdiń sý qoımalarynda jumysty kúsheıtti

QOSTANAI. QazAqparat – Qostanaı oblysyna salqyn aýa raıynan keıin qaıtadan shildeniń aptap ystyǵy keldi. Óńirde aýa raıy boıynsha eskertý jarııalandy, sý qoımalarynda qutqarýshylar jumysyn jandandyrdy, dep habarlaıdy QazAqparat tilshisi.

Oblystyń TJD habarlaýynsha, bul kezde sý nysandarynda tótenshe jaǵdaılar men apattardyń oryn alý qaýpi joǵarylaıdy.

Jazǵy maýsymnyń ortasyndaǵy qutqarýshylardyń jumysy týraly brıfıng barysynda jergilikti BAQ ókilderine Qostanaı oblysynyń TJD bastyǵynyń orynbasary Azamat Órimbaev aıtyp berdi.

«Jaqyn kúnderi aýa temperatýrasy 36 gradýsqa deıin kóteriledi dep kútilýde. Soǵan oraı, Qostanaı oblysynyń TJD turǵyndardy sýdaǵy qarapaıym qaýipsizdik erejelerin saqtaýǵa shaqyrady. Ókinishke oraı, sý qoımalaryndaǵy bıylǵy statıstıka kóńil kónshiterlik emes. Sýǵa túsý kezinde 11 adam mert boldy, olardyń altaýy - bala», - dep atap ótti TJD ókili.

Osyndaı ystyq kúnderi aldyn alý sharalary kúsheıtilgen, sebebi sýda demalatyndar sany edáýir kóp. Qutqarýshylardyń mindeti – turǵyndarǵa der kezinde eskertý jasaý, óńirdiń sý qoımalarynda tótenshe jaǵdaılardyń aldyn alý.

«Qutqarýshylar toptary kúndelikti ózender men kólderdiń akvatorııalary, jasandy shuńqyrlar boıynsha reıdter men patrýldeý júrgizedi. Halyqpen aldyn alý sharalaryn ótkizýde tártip saqshylary, jergilikti atqarýshy organdar men eriktiler uıymdary kóp kómek kórsetýde», - dedi A. Órimbaev.

TJD málimdeýinshe, aldyn alý sharalary sýǵa shomylý maýsymynyń aıaǵyna deıin jalǵaspaq.