358 mln teńge: Atyraýda bıýdjet qarjysyn ıgerýde zańbuzýshylyq bolǵan

KAZINFORM. ATYRAÝ — Oblysqa qarasty Isataı aýdanynda ekinshi jartyjyldyqta memlekettik satyp alý salasynda iri kólemdegi zań buzýshylyqtar tirkeldi. Atyraý oblysy boıynsha Іshki memlekettik aýdıt departamenti júrgizgen kameraldyq baqylaý nátıjesinde jalpy somasy 358,2 mln. teńgeni quraıtyn ereje buzý derekteri anyqtalyp, olardy joıý jóninde 58 habarlama joldandy.

Aýdıttik baqylaý 2025 jylǵy 1 shilde men 30 qarasha aralyǵyn qamtyǵan. Tekserý barysynda satyp alý rásimderiniń birqatarynda zań talaptarynyń saqtalmaǵany belgili boldy. Bul jóninde Kazinform tilshisine departament basshysynyń orynbasary Zoıa Saparova málimdedi.

Zańbuzýshylyqtardyń basym bóligi baǵa usynystaryn suratý (BUS) tásilimen júrgizilgen satyp alýlarda tirkelgen. Bul baǵytta 38 habarlama joldanyp, qarjylyq kólemi 178,3 mln. teńgege jetken. Atalǵan soma anyqtalǵan zańbuzýshylyqtardyń jalpy kóleminiń 49,78 paıyzyn quraıdy.

Sondaı-aq basqa satyp alý tásilderi boıynsha da kemshilikter anyqtalǵan. Atap aıtqanda, bir kózden alý (shartty tikeleı jasasý) tásili boıynsha 13 habarlama joldanyp, buzýshylyqtar somasy 138,1 mln teńgeni quraǵan.

Qosymsha kelisimderge qatysty 6 habarlama tirkelip, olardyń jalpy somasy 14,5 mln. teńge bolǵan.

Al konkýrs pen aýktsıondar aıasynda 27,2 mln. teńgege bir zańbuzýshylyq deregi anyqtaldy.

Іshki memlekettik aýdıt departamentiniń málimetinshe, joldanǵan habarlamalar boıynsha zańbuzýshylyqtardy joıý jáne satyp alý rásimderin zań talaptaryna sáıkestendirý jumystary júrgizildi.

Osyǵan deıin Áleýmettik tólemder júıesinde 216 mlrd teńge orynsyz jumsalǵanyn habarlaǵan edik.