358 mln teńge shyǵyn: Bıyl qarjy pıramıdalaryna qansha adam aldandy

ASTANA. KAZINFORM — Jyl basynan beri 252 adam qarjy pıramıdalarynyń quryǵyna ilinip úlgergen. Olar 358 mln teńgesinen qaǵylǵan. Bul týraly Qarjylyq monıtorıng agenttiginen málim etti.

– 2025 jyly qarjy pıramıdalaryna aqsha salǵan 464 adamnyń ishinen 252 adam zardap shegýshi retinde tanyldy. Jyl basynan bergi ǵana zalal 358 mln teńgeden asty, – dep jaýap berdi mekeme mamandary agenttik tilshisiniń saýalyna.

Al sońǵy 4 jylda el turǵyndary qarjy pıramıdalaryna aqsha quıamyn dep, 36 mlrd teńgeden astam shyǵynǵa ushyraǵan.

– Sońǵy 4 jylda Qarjylyq monıtorıng organdarynyń óndirisinde bolǵan ister boıynsha qarjy pıramıdalaryna 74 738 adam tartylǵan, onyń ishinde 16 278 adam zardap shekti dep tanylǵan. 4 jyl ishinde qarjy pıramıdalarynan keltirilgen zalal shamamen 36 mlrd 248 mln teńgeni qurady. 2021 jyldan bastap búgingi kúnge deıin Qarjylyq monıtorıng organdary zardap shekkenderden 17 myńǵa jýyq ótinish qarady, – deıdi olar.

Agenttik ókilderi qarjy pıramıdasynyń kesirinen qaltasynan qaǵylǵan azamattar shyǵynyn qalaı óteı alatynyn aıtty.

– Agenttik osy sanattaǵy isterdi tergeý barysynda zardap shekkenderge zalaldy «tiri» aqshamen, onyń ishinde kúdiktilerdiń múlkine tyıym salý arqyly óteýdi qamtamasyz etedi. Sonymen qatar, sot aıyptaý úkimin shyǵarǵan kezde, sottalǵandardan zardap shekkenderge keltirilgen zalaldyń somasy óndirilip alynady, – deıdi vedomstvo qyzmetkerleri.

Eske sala keteıik, bes myńnan astam adamnyń qarjysyn tartqan «HAS» qarjy pıramıdasyn uıymdastyrýshylar sottaldy.

Odan bólek, Shymkentte 4 myńnan astam adamdy aldap soqqan qarjy pıramıdasy anyqtaldy.