Aqtóbedegi 350 stýdenttiń shaǵymy: rektordyń buıryǵy zańsyz bolyp shyqty
AQTÓBE. KAZINFORM – Qazaq-orys halyqaralyq ýnıversıteti rektorynyń 350 stýdentti oqýdan shyǵarý týraly buıryǵy zańsyz bolyp shyqty. Buǵan deıin habarlama alǵan stýdentter oqýyn jalǵastyra alady.
Keshe 350 stýdent ózderiniń oqýdan shyǵyrylǵanyn bilip, onyń sebebin surady. Al búgin túste óńirge QR Ǵylym jáne joǵary bilim mınıstrligi Joǵarǵy jáne joǵarǵy oqý ornynan keıingi bilim komıteti tóraǵasynyń orynbasary Aqerke Abylaıhan keldi. Arada 4 saǵat ótkende tekserýdiń alǵashqy qorytyndysy shyqty.
– Bul – jekemenshik ýnıversıtet. Biraq el zańyna baǵynady. Birinshiden, oqýdan shyǵarý týraly buıryq 2025 jyldyń 18 naýryzy kúni shyqqan. Mınıstrlik buıryǵyna sáıkes eger stýdent oqýdan shyǵarylsa, joǵary bilim platformasyndaǵy statýsy ózgerýi kerek. Bul ózgermegen. ıAǵnı, bári de stýdent. Ekinshiden, shyǵarylǵan buıryq tek orys tilinde boldy. Zań talaptary boıynsha qujat qazaq tilinde bolýy shart. Ýnıversıtettiń qujattarynda quqyqtyq suraqtar kóp. Kelisimshartta 40 saǵat sabaqtan qalsa dep jazylǵan, al ýnıversıtettiń ishki erejesinde 60 saǵat dep jazýly tur. Qazirgi kezde barlyq stýdenttiń quqyqtyq statýsy saqtalǵan. Oqýdan shyǵarylmaıdy, - dedi QR Ǵylym jáne joǵary bilim mınıstrligi Joǵarǵy jáne joǵarǵy oqý ornynan keıingi bilim komıteti tóraǵasynyń orynbasary Aqerke Abylaıhan.
Onyń aıtýynsha, stýdentterdiń bári bıyl sessııasyn aıaqtaı alady. Al rektordyń oqýdan shyǵarý týraly buıryǵy zańsyz.
– Stýdenttiń nege sabaqqa kelmegenin zerdeleımiz. Stýdent sabaqqa mindetti túrde qatysýy tıis. Qazirgi kezde 100-den astam stýdentiń túsiniktemesi bar. Túrli sebebi aıtylǵan. Olar sabaqqa kelemiz, qatysamyz dep otyr. Sessııany aıaqtap, basqa ýnıversıtetke de aýysa alady, - dedi Aqerke Abylaıhan.
Eske salsaq, Qazaq-orys halyqaralyq ýnıversıtetinde oqýǵa kelmegen, oqý aqysyn tólemegen 350 stýdent oqýdan shyǵaryldy. Dálirek aıtqanda 91-i oqý aqysyn tólemegen, qalǵan 259 stýdent sabaqqa múlde qatyspaǵan.