350 stýdent oqýdan shyǵaryldy: Aqtóbege mınıstrlik ókili keledi

AQTÓBE. KAZINFORM – Qazaq-orys halyqaralyq ýnıversıtetiniń 350 stýdenti oqýdan shyǵaryldy. Mán-jaıdy bilmekke óńirge mınıstrlik ókili keledi. 

Qazaq-orys halyqaralyq ýnıversıtetinde oqýǵa kelmegen, oqý aqysyn tólemegen 350 stýdent oqýdan shyǵaryldy.

— Ýnıversıtette oqýdan shyǵarylǵan bilim alýshynyń 91-i oqý aqysyn tólemegen, qalǵan 259 stýdent sabaqqa múlde qatyspaǵan. Olar rektordyń buıryǵymen oqýdan shyǵaryldy. Qashyqtan oqıtyndar bolǵanymen, kelip, ýnıversıtetpen baılanysta bolýy kerek. Olar eshqandaı da baılanysta bolmaǵan. Tekserýdi rektor aqpan aıynda júrgizdi, sonyń nátıjesinde shyǵyp tur. Mektepten keıin túsken bilim alýshylar sabaqqa kelý kerek ekenin biledi, kýratorlar olardy qulaqtandyrdy. Mindetti túrde eskertý bolady, - dedi ýnıversıtettiń Aqnur Qadyrbek. 

Onyń aıtýynsha, rektor qazir densaýlyǵyna baılanysty demalysta. Stýdentterdiń taǵdyry qalaı bolaryn, qandaı múmkindik qarastyrylatyny ázirge anyq aıtylmady. Bul jaıt mınıstrlikke de jetti. 

— Aqtóbedegi JOO-da bolǵan jaǵdaı búginde mınıstrlik baqylaýyna alyndy. Joǵarǵy jáne joǵarǵy oqý ornynan keıingi bilim komıtet tóraǵasynyń orynbasary Aqerke Abylaıhan oqıǵa ornyna mán-jaıdy anyqtaý úshin attandy. Qosymsha aqparattar bolsa habarlanady, - dedi QR Ǵylym jáne joǵary bilim mınıstrligi Qoǵammen baılanys departamentiniń dırektory — baspasóz-hatshysy Oljas Berkinbaev. 

Aıta keteıik, ýnıversıtette 2 myńnan astam stýdent bar. Olar 17 mamandyq boıynsha bilim alady. Búgin ata-analar balalarynyń tizimde bar-joǵyn anyqtaý úshin oqý ornyna kelip, ákimshilikpen kezdesip jatyr.

Eske salsaq, byltyr Aqtóbede Heriot-Watt ýnıversıtetiniń 107 stýdenti ekinshi kýrsqa kóshpeı qaldy.