350 myńǵa jýyq qazaqstandyq qumar oıyndaryn oınaıdy - agenttik

ATYRAÝ. QazAqparat- Atyraýdyń eki turǵyny zańsyz oıyn bıznesin uıymdastyrǵany úshin sottaldy. Bul týraly QazAqparat Qarjy monıtorıngtik agenttiktiń baspasóz qyzmetine silteme jasap habarlaıdy.

Qumar oıyndar oıyn – bul saýyq emes, qaýipti aýrý. Jyl saıyn qumar oıyndarǵa táýeldi adamdardyń sany artyp keledi.

Mysaly, Qazaqstanda qumar oıynshylar sany 350 myńǵa jýyq. Olardyń kópshiligi jasóspirimder.

Memleket turaqty negizde zańsyz oıyn bıznesine qarsy kúres júrgizedi, sol arqyly halyqty qumar oıyndardyń zııandy áserinen qorǵap keledi.

Jedel-izdestirý is-sharalarynyń nátıjesinde Atyraý oblysy boıynsha QMA aýmaqtyq departamentiniń qyzmetkerleri Atyraý qalasyndaǵy bılıard klýbynyń ǵımaratynda zańsyz oıyn bıznesin sáıkes lıtsenzııasyz uıymdastyrý dereginiń jolyn kesti.

Atyraý q. eki turǵyny – D.Uzaqpaev jáne A.Ǵabdýlov zańsyz qumar oıyndaryn uıymdastyrý maqsatynda «Bomond» bılıard klýbynyń «VIP» kabınasyn paıdalanǵan.

Tekseris barysynda 600-ge jýyq oıyn kartalary men poker fıshkalary tárkilendi.

Uıymdastyrýshylar qoǵamdyq jumystarǵa 100 saǵatqa tartyla otyryp, 2 jylǵa bas bostandyǵyn shekteýge jazasymen sottaldy.