35 jylda 2 mln jýyq kóshet ektim — qyzylordalyq qart baǵban
QYZYLORDA. KAZINFORM — Jasy 85-ten asqan qyzylordalyq Bektaı Súleımenov oblys ortalyǵyn kógaldandyrý isine bir kisideı úles qosyp keledi. Kazinform tilshisi qarttyǵyna qaramastan áli kúnge qolynan kúrek-ketpeni túspegen aqsaqalmen suhbattasty.
Keıipkerimiz tal otyrǵyzýdy 12 jasynan bastaǵan.
Sodan beri qara jerge qadaǵan kóshetiniń sany 2 mln-ǵa jetipti.
35 jylda qalanyń syrt jaǵyndaǵy 8 gektar jerdi baqqa aınaldyrǵan.
— Áýelgide 4-5 sotyq jerge shaǵyn nasospen sýarý arqyly kóshet egýden bastadym. Qazir munda alma, almurt, shıe, sary órik, qara órik, jıde, júzimniń úsh-tórt sorty, taýly jerde ósetin arsha, bot arsha, boz arsha sııaqty aǵashtarǵa deıin bar. Qyzylordanyń klımatynda kóshetti kúzde egýdiń tıimdiligi tómen. Odan kóktemde ekken durys. Jazda qylqan japyraqtylardy egýge bolady, — dedi Bektaı Súleımenov.
Beınetkesh aqsaqal — Qyzylordany jasyl qalaǵa aınaldyrýǵa bolatynyn dáleldegen jan. Oǵan jetýdiń joly qur naýqanshyldyq emes, shynaıy ynta men eńbek qana ekenine kóp adamnyń kózin jetkizdi.
Suhbat barysynda ol oblystyq ftızıopýlmonologııa ortalyǵynyń emdelýshileri úshin tıimdi usynysyn jetkizdi.
— Ókpe aýrýyna shaldyqqan naýqastar úshin jasyl jelektiń paıdasy mol. Dárigerler týbdıspanserde jatyp emdelgen naýqastarǵa emi bitkesin Kókshetaýdaǵy, Soltústik Qazaqstandaǵy qaraǵaı ormanyna barýdy usynady. Osyndaı jaǵdaıdy ózimizde de jasaýǵa bolady. Jergilikti bılik máselege kóńil bólip, qarajat qarastyrsa, 7-8 gektar jerge qatarlastyryp aǵash egýge ózim kómekteser edim. Naýqastar em-dom qabyldaǵannan keıin jasyl jelekte taza aýa jutyp, serýendep júrse, densaýlyǵyn túzeýge kóp kómekteser edi, — dedi ol.
Jastaıynan beınetke beıimdelgen qarııanyń sharýasyna qazirgi kúni balalary men nemereleri qolǵabys jasap júr.
Aıta keteıik, baǵban týraly Qazaqstan Respýblıkasy Prezıdentiniń teleradıokesheni jýyrda «Baǵban» derekti fılmin túsirdi.
Sondaı-aq ol Jibek Joly telearnasy uıymdastyrǵan saltanatty marapattaý rásiminde «Jaqsy adam — 2025» arnaıy syılyǵyn ıelendi.