35 jerden pyshaqtap, kóliktiń júksalǵyshyna salǵan: Aqtóbede rezonans týdyrǵan oqıǵanyń mán-jaıy belgili boldy
Oqıǵa bıyl qysta boldy. Buǵan deıin habarlaǵanymyzdaı, 1976 jyly týǵan aqtóbelik 23 aqpan kúni jumysqa shyǵyp, úıine qaıta oralmaǵan. Polıtsııa izdeý jumystarynan soń 29 jastaǵy kúdiktini ustady. Ol áıeldi pyshaqtap óltirip, denesin eki kún boıy kóliginiń júksalǵyshynda ustaǵan. Oqıǵadan soń Qylmystyq kodekstiń «Kisi óltirý» baby boıynsha is qozǵalyp, tergeý júrdi. Búgin Aqtóbe oblystyq qylmystyq ister jónindegi mamandandyrylǵan aýdanaralyq sotynda aıyptaý aktisi oqyldy. Memlekettik aıyptaýshynyń aıtýynsha, sottalýshy D. bıyl 15 aqpan kúni jábirlenýshimen saıt arqyly tanysqan. Otbasynan ajyrasqanyn aıtqan. Al 21 aqpany kúni sottalýshy jeńil kólikti jalǵa alady. Keıin jábirlenýshini kútip alyp, úıine jetkizip tastaıdy. Sol kúni telefon arqyly qaıta habarlasyp, jynystyq qatynasqa túsedi.
«23 aqpan kúni saǵat 19:00-de kútip alyp, taǵy kezdesedi. Sol kezde sottalýshynyń anasy qońyraý shalyp, jigittiń uıaly telefony betinde turǵan otbasy fotosy kórinedi. Ekeýi sózge kelip, jábirlenýshi sońynda jasyryn araqatynas týraly áıeline aıtatynyn jetkizgen. Sottalýshy osy kózden qorqyp, ashýǵa salynady. Kóliktiń aldyńǵy esigindegi tartpada turǵan pyshaqty alyp, kıinip jatqan jábirlenýshiniń keýde tusyna, qol-aıaǵyna jaraqat salyp, qınap, tunshyqtyrý úshin tamaǵyn, jelkesin birneshe ret keskileıdi. Tiri kezinde 35 kesip-tesilgen dene jaraqatyn keltirgen», - dedi aıyptaý aktisin oqyǵan prokýror. Jábirlenýshi dene jaraqaty saldarynan oqıǵa ornynda qaza tapqan. Keıin sottalýshy jábirlenýshiniń denesinen qutylý, qylmystyq is-áreketin jasyrý maqsatynda kóliktiń júksalǵyshyna aıaq-qolyn búktep salyp qoıǵan. Sotta sottalýshy óz kinásin moıyndady. Alaıda qatygezdikpen óltirdi degenge kelispeıdi.
«Saıt arqyly tanystym. Alǵashynda tek sol saıt arqyly sóılesip júrdik. Uıaly telefon nómirin alyp, sóılestik. Úshinshi kúni tósek qatynasyna túse almaı qalyp, ol maǵan «aýrýsyń» dedi. Sol ýaqytta anam habarlasyp qaldy. Fotony kórip, otbasyma aıtamyn dedi. Bir ret áıelimnen ajyrasqanmyn. Úsh balam bar. Eki balam birinshi áıelimnen. Ekinshi ret otbasymdy joǵaltyp alamyn ba dep qorqyp, sondaı áreketke bardym», - dedi sottalýshy.
Kisi óltirgen soń ony kóliktiń júksalǵyshyna salyp, kıimin, kóligin jýǵan. Alaıda polıtsııa izdep kelgende óz erkimen oqıǵany eshkimge aıtpaǵan.
Sot otyrysynda jábirlenýshiniń ókili apasynyń oblystyq ákimdikte jumys istegenin, esh teris qylyǵy bolmaǵanyn aıtty. Ol 10 mln teńge moraldyq shyǵyn talap etti.
«Anam júre almaıdy, aıaǵy aýyrady. Anam keshirmeımin deıdi. Keshirimge kelgen, men kórmedim. Ol apamdy aldaǵan. Óte qatygezdik jasaǵan. Sot sheshimin beredi dep oılaımyn. Ata Zańda eń qundysy adam ómiri degen. Eshkim adamdy óltirmeýi kerek», - dedi jábirlenýshiniń ókili.
