35 jerden pyshaqtalǵan: Nuraı Serikbaıdyń ólimine qatysty derekter sotta aıtyldy
ShYMKENT. KAZINFORM — Shymkent qalasynyń qylmystyq ister jónindegi mamandandyrylǵan aýdanaralyq sotynda 21 jastaǵy stýdent Nuraı Serikbaıdyń ólimine qatysty is boıynsha aldyn ala tyńdaý ótti. Aıyptalýshy Sherhan Aımahan isti alqabılerdiń qatysýymen qaraýdan bas tartty.
Sherhan Aımahanǵa nekege turýǵa májbúrleý, ańdý jáne asa qatygezdikpen adam óltirý baptary boıynsha aıyp taǵylyp otyr.
Aldyn ala tyńdaý bastapqyda 21 shildege belgilengen bolatyn. Alaıda aıyptalýshynyń syrqatyna baılanysty keıinge qaldyryldy.
Búgingi sot otyrysyna Aımahan kúzetpen jetkizildi. Onyń moıny tańylǵan bolatyn. Tyńdaýǵa Nuraı Serikbaıdyń ákesi qatysty. Іs boıynsha kýáger bolyp otyrǵan onyń aǵasy Dımash jaýap alý bastalǵanǵa deıin sot zalynan shyǵaryldy. Aıyptalýshynyń múddesin tórt advokat, al jábirlenýshi tarapty eki qorǵaýshy tanystyrady.
Aldyn ala tyńdaý qorytyndysy boıynsha tóraǵalyq etýshi sýdıa Sammıdın Temiralıev isti basty sot talqylaýynda qaraýdy belgiledi.
— Aıyptalýshyǵa isti alqabılerdiń qatysýymen qaraý quqyǵy túsindirildi. Ol isti alqabılersiz qaraýdy surady. Sot basty sot talqylaýyn taǵaıyndaýǵa kedergi keltiretin negizderdi anyqtaǵan joq. Qamaýda ustaý túrindegi bultartpaý sharasy ózgerissiz qaldyryldy. Sot otyrysy 28 shilde kúni saǵat 10:00–ge belgilendi, — dedi sýdıa.
Sot protsesi memlekettik aıyptaýshynyń, jábirlenýshi taraptyń, advokattardyń jáne BAQ ókilderiniń qatysýymen ashyq túrde ótedi.
Aldyn ala tyńdaý kezinde prokýror Madııar Ábilqasymov aıyptaý aktisin jarııalady. Tergeý nusqasyna sáıkes, Sherhan Aımahan men Nuraı Serikbaı 2025 jylǵy 3 shildede Shymkentte toıda tanysqan. Tanystyqtan keıin ol boıjetkenge gúl syılap, áleýmettik jeliler men messendjerler arqyly hat jazysqan. Keıin olar biraz ýaqyt kezdesken.
Tamyz aıynyń sońynda Nuraı Almatyǵa oqýǵa ketken. Ol qurbylarymen birge páter jaldap turǵan. Bir aıdan keıin Aımahan onymen kezdesip, úılenýge usynys jasaǵan. Alaıda qyz oǵan daıyn emes ekenin aıtyp, usynystan bas tartqan.
Aıyptaý materıaldary boıynsha, 2025 jylǵy qazan aıynda keshke Aımahan Nuraı turǵan páterge kelip, ony túngi Almatyda serýendeýge shaqyrǵan. Jolda kele jatqanda ol qyzdy kúsh qoldaný arqyly nekege turýǵa májbúrleý týraly sheshim qabyldaǵan. Nuraı qaladan shyǵyp ketkenderin túsinip, qarsylyq bildirgen kezde Sherhan Aımahan qarsylyq kórsetse, jol apatyn uıymdastyratynyn aıtyp qorqytqan.
Kelesi kúni ol qyzdy Shymkentke alyp kelgen. Aldymen óz úıine, keıin Saıram aýdanyndaǵy týystarynyń úıine aparǵan. Aıyptaý aktisinde kórsetilgendeı, sol keshte munda «kelin túsirý» rásimi ótken. Nuraıdyń basyna oramal jabylyp, ony kelin bólmesine kirgizgen.
Keıin qyzdyń aǵalary polıtsııamen birge Aımahannyń úıine barǵan. Nuraı ózin alyp ketýdi suraǵan. Osydan keıin ekeýi Qarataý aýdandyq polıtsııa basqarmasyna túsinikteme berý úshin jetkizilgen. Tekserýden soń qyz týystarymen birge bosatylǵan. Aımahan endi mazalamaıtynyn aıtqan.
Keıin polıtsııa qyzmetkerleriniń áreketine qatysty nemquraılylyq baby boıynsha jeke qylmystyq is tirkelgen.
Tergeý nusqasy boıynsha, osy oqıǵadan keıin de Aımahannyń qýdalaýy toqtamaǵan. Ol birneshe ret qyzdyń úıine barǵan, Almatyǵa saparlap, onyń júrgen jerin kýrstastarynan suraǵan. Nuraı telefon nómirin birneshe ret aýystyrǵanyna qaramastan habarlasýyn jalǵastyrǵan. Aıyptaý aktisine sáıkes, tek 7 qazanda onyń erkinen tys baılanys ornatý maqsatynda 76 ret qońyraý shalǵan.
2026 jylǵy 11 qańtar keshki saǵat 18:30 shamasynda Aımahan Nuraı turǵan úıdiń aldyna kelip, avtoturaqta kútken. Ózimen ala júrgen pyshaǵy bolǵan. Nuraı dúkenge shyqqan kezde ol qyzdy serýendeýge shaqyrǵan.
Nuraı bas tartqan soń Aımahan oǵan shabýyl jasap, pyshaqpen jaraqat sala bastaǵan. Nuraıdyń aıqaıyn estigen kýáger syrtqa shyqqan. Kýágerdi kórgen Aımahan birneshe metrge shegingenimen, keıin qaıta oralyp, jerde jatqan qyzǵa soqqy jasaýdy jalǵastyrǵan.
Aıyptaý aktisine sáıkes, Nuraıǵa barlyǵy 35 pyshaq jaraqaty salynǵan. Onyń toǵyzy moıyn, keýde jáne qursaq qýysyna ótken. Qyz alǵan jaraqatynan oqıǵa ornynda kóz jumǵan. Sot-medıtsınalyq saraptama qorytyndysyna sáıkes, ólimge kóp qan joǵaltýdan bolǵan gemorragııalyq shok sebep bolǵan.
Keshendi sot-psıhologııalyq-psıhıatrııalyq saraptama Sherhan Aımahandy esi durys dep tanyǵan. Sarapshylardyń qorytyndysy boıynsha ol qylmys jasaǵan kezde óz áreketiniń sıpaty men qoǵamdyq qaýiptiligin túsingen, olardy basqara alǵan jáne affekt jaǵdaıynda bolmaǵan. Sonymen qatar onda obsessıvti-kompýlsıvti buzylys belgileri anyqtalǵan, alaıda bul jaǵdaı esi durystyǵyn joqqa shyǵarmaıdy jáne májbúrli emdeýdi qajet etpeıdi.
Aıyptaý aktisi jarııalanǵannan keıin aıyptalýshy taǵylǵan aıypty túsinbeıtinin jáne moıyndamaıtynyn aıtty. Bul málimdemege jábirlenýshi taraptyń advokaty Aıanhan Omarov túsinikteme berdi.
— Alqabılerden bas tartý — aıyptalýshynyń zańdy quqyǵy, ol osy quqyǵyn paıdalandy. Al aıypty túsinbeıtinin aıtýyna kelsek, menińshe, bul ne qorǵaný taktıkasy, ne jaǵdaıdy qoldan jasaý áreketi. Buǵan deıin de ol psıhıkalyq jaǵdaıyn kórsetýge tyrysqan. Sonymen qatar qylmystyq is materıaldarymen tolyq tanystyrylǵan, — dedi advokat.
Onyń aıtýynsha, jábirlenýshi tarap aıyptaý aktisindegi keıbir tujyrymdarmen kelispeıdi. Óıtkeni olar Nuraıdyń aıyptalýshymen nekege turý maqsatynda qarym-qatynas jasaǵandaı áser qaldyrýy múmkin.
— Bul olaı bolǵan joq. Ol onyń nazar aýdarý áreketterin qabyldady, sóılesti. Biraq onyń nıetin túsingen kezde qarym-qatynasty toqtatty. Eki aı ishinde onymen baılanysýǵa 140-tan astam áreket jasalǵan. Nuraı telefon nómirin birneshe ret aýystyrǵanymen, ol ony ańdýyn jalǵastyrdy, — dedi advokat.
Aıanhan Omarovtyń aıtýynsha, 28 shildede sot isti jábirlenýshi tarapty jaýap alýdan bastaıdy. Alǵash bolyp sotta Nuraı Serikbaıdyń ákesi jaýap beredi. Odan keıin qyzdyń aǵalary, kýrstastary, basqa da kýálar, mamandar men sarapshylar tyńdalady. Zattaı dálelder men beınejazbalar zerttelgen soń, sot aıyptalýshydan jaýap alýǵa kóshedi.
Eske salaıyq, bıyl 11 qańtarda Shymkentte 21 jastaǵy stýdent Nuraı Serikbaı qaza tapty. Keıin kúdikti qaladan shamamen 10 shaqyrym jerde ustalyp, tergeý ızolıatoryna qamaldy.
Іs qoǵamda rezonans týdyrǵannan keıin Prezıdent tapsyrmasymen Shymkent qalasy polıtsııasy qyzmetkerleriniń áreketine tekserý júrgizildi.
Sondaı-aq Іshki ister mınıstrligi qyzdyń nekege turýǵa májbúrleý týraly aryzynan keıin tıisti shara qoldanbaǵan polıtseılerge qatysty salǵyrttyq faktisi boıynsha jeke qylmystyq is qozǵady.
Tergeý barysynda kúdikti sot-psıhıatrııalyq saraptamadan ótip, esi durys dep tanyldy.
Aıyptalýshy Sherhan Aımahannyń densaýlyǵyna baılanysty Nuraı Serikbaıdyń soty keıinge qaldyryldy.
