35 jastaǵy azamat 4 adamdy qutqaramyn dep keýdesin oqqa tosty
ASTANA. QazAqparat - Ońtústik Sahalınniń ǵıbadathanasyndaǵy atysta mert bolǵan 2 adamnyń biri, 35 jastaǵy azamat shirkeýdegilerdi qutqaramyn dep keýdesin oqqa tosqan.
Bul jaıynda ITAR-TASS Ońtústik Sahalın jáne Kýrıl eparhııasynyń baspasóz qyzmetine silteme jasap habarlady.
Taratylǵan aqparatqa qaraǵanda, oqqa ushqan adamnyń biri oblys ortalyǵynyń turǵyny 1979 jyly dúnıege kelgen Vladımır Zaporojets ekendigi anyqtaldy.
«Atysty estigen Vladımır shirkeýge júgirip kirgen. Beınebaqylaý kamerasyndaǵy túsirilimge qaraǵanda, ol atqan adamdy toqtatý úshin baryn salǵan. Aıaǵyna oq tıgenine qaramastan ol alǵa jyljyp, atysty toqtatýǵa árekettengen. Ókinishke oraı myltyq daýysy qaıta estilip, oq Vladımırdiń keýdesi men basyna tıgen. Alǵan jaraqatynan ol oqıǵa ornynda qaza tapty», - delingen habarlamada.
Esterińizge sala keteıik, keshe jergilikti ýaqytpen shamamen saǵat 14:00-de kúzet agenttiniń qyzmetkeri 25 jastaǵy jergilikti turǵyn shirkeýge basa-kókteı kirip, birneshe ret oq jaýdyrǵan. Hram qyzmetkeri, monah áıel jantásilim etti, shirkeýge kelgen 6 adam jaralanǵan. Oq atqan adam oqıǵa bolǵan jerde qolǵa tústi, onyń kim ekendigi aıtylmaýda. Qandyqoldyń mundaı áreketke ne sebepti barǵandyǵy ázirge belgisiz.
Shirkeýdegi atys saldarynan qaza tapqandardyń otbasylaryna 2 mln., al zardap shekkenderge 1 mln. rýbl kóleminde kómek kórsetiledi.
